Үөрэхпит кыһата, коллективпыт диэн уопсай дьыала туһугар ис сүрэхтэриттэн кыһаллар көхтөөх ыччат колледжка элбэх, кинилэрдиин бииргэ үлэлиир, алтыһар олус интэриэһинэй. Тус бэйэм кинилэр киһиэхэ истиҥ сыһыаннаах эйгэлээхтэрин, кыайтарбатах түгэннэргэ көмөҕө этиннэххэ, көрдөһүүнү быһа гыммакка, күлбүтүнэн-үөрбүтүнэн улгумнук ылына охсон, оҥорсубутунан барар өбүгэ үтүө үгэһин сыаналыылларын, күннээҕилэригэр тутталларын олус сэргиибин уонна хайгыыбын. Бары үлэ-хамнас килбэйэр киинигэр сылдьаллара биллэр, онтон быыс булан, эбии түбүк — садьык диэбэккэ, наадалаах дьыалаҕа кыттыһан, үөрүүнү үксэтэллэр, сырдык санааны саҕаллар. Былырыыҥҥыттан колледжка “Түмэн” диэн олус бэргэн ааттаах түмсүү тэринэн, ол тула колледжка үлэлиир эдэр дьон мунньустан, үтүө дьыала чэрчитинэн сэргэх хамсааһыны көҕүлүүллэр. Холобурдаан эттэххэ, бэтэрээннэргэ хаһаайыстыбаларыгар быһаччы көмө оҥоруута, маны барытын уолаттар буор-босхо туһалыыллар. Онтон бу сырыыга “Түмэннэр” Учуутал аллеятыгар бочуоттаах миэстэни ылар бэртээхэй истиэндэ туруордулар. Истиэндэ ис хоһоонугар училище — колледж историята кэпсэниэ, уһулуччулаах выпускниктар мэтириэттэрэ ыйаныахтара. Олор истэригэр бааллар Социалистическай Үлэ Геройдара В. Т. Семенов, Г.Е.Бессонов, Сэбиэскэй Сойуус Геройа Н.А.Кондаков, норуодунай учуутал Н.И.Афанасьев, норуодунай поэт П.Н.Тобуруокап, өрөспүүбүлүкэ Бочуоттаах олохтоохторо К.Е.Павлов, К.Е.Иванов, Н.И.Протопопова, В.А.Петрова, итиэннэ үөрэхтэрин кыһатын киэҥ дуолга сураҕырпыт үөрэнээччилэр, училищеҕа-колледжка олохторун анаабыт салайааччылар, үтүөлээх үлэһиттэр ааттара-суоллара киириэхтэрэ.
Манна эбии бүгүҥҥү саҥардыллыбыт колледж үлэтин ис хоһооно сырдатыллыа. Инньэ гынан, Учуутал аллеятын биир сүрүн сыала — колледж баай историятын сэгэтэн көрүү, дьоҥҥо-сэргэҕэ билиһиннэрии силигин ситэрэ киһини үөрдэр. Бу суолталаах үлэҕэ ылсыбыт, тиһэҕэр тириэрдиспит кыайыгас-хотугас эдэр дьоммут — кинилэр кимнээхтэрий: спорт уонна маассабай физкультура боппуруостарынан дьарыгырар салайааччы, бэйэтэ өрөспүүбүлүкэ чулуу спортсмена Н.И.Николаев, И.И.Баснаев, учууталлар, маастардар С.Г.Петров, А.Н.Никифоров, Н.Н.Семенов, М.Н.Соломонов, Н.Н.Софронеев, И.И.Саввинов, В.В.Анисимов, Г.Э Протопопов, А.Н.Сыромятников уонна И.Ю.Никифоров, А. И. Колтовской.
“Түмэннэр” үбүлүөйдээх сылга былааннара элбэх, олортон биири ааттаан ааһар буоллахха, маннык баар. Училищеҕа-колледжка үөрэнэн, үлэлээн ааспыт үлэһиттэр үтүө ааттарын санатар, киэҥ дуолга таһаарар, үйэтитэр соруктаах, кинилэр айымньыларыгар олоҕуран уус-уран композиция телевизионнай барыйаанын туруоруу үбүлүөйдээх сылга сэмэй бэлэх буолуоҕа. Бу уолаттар курдук, сылдьар былаһын тухары, дьоҕус да буоллун инникигэ былааннардаах, элбэх баҕа санаалаах киһини дьон сэргии көрөр, кини ханна баҕарар кэрэхсэнэр, сыаналанар, кини таһыгар биир санаалаахтара түмсэллэр. Маннык ыччаттарбытын өрө тутан, санааларын самнарбакка, кэҕиннэрбэккэ, бэйэлэригэр эрэллээх, күүстээх — кыахтаах буолалларыгар туруктарын бөҕөргөтөр өйөбүл буолуохха, тэтим тэбэн, суол-иис тэлэн биэриэххэ, аттыбытыгапр чугаһатан, сылайбакка сүбэлиэххэ-амалыахха. Кинилэр буолаллар олоҕу хамсатар модун күүс, эр дьон хайдаҕыттан олох хаамыыта, дойду инникитэ улахан тутулуктаах диэтэхпитинэ баһан этии буолбатах. Сүрэх баҕатынан үчүгэйи үксэтэр уол оҕо — норуот кэскилэ, оннук эр киһи — сарсыҥҥыга эрэл. “Түмэннэри” кытары Аллеяҕа сэмэй кылааттарын килллэристэ “Лидер” диэн эдэр учууталлар кулууптара, салайааччы Уйгулаана Семенова. Учуутал аллеятын ураты суолталаан биэрэр истиэндэни оҥорууга урбаанньыттар Буслаев А.И., Арбыкин А.А., Тимофеев Ю.Н., куорат Сэбиэтин депутата В.В.Иванов күн-дьыл ыгымын учуоттаан, көрдөһүүбүтүн быһа гыммакка, түргэн үлүгэрдик быһаарына охсон, илиилэрин утары ууммуттарыгар улахан махталбытын тириэрдэбит.
Светлана Мытник
