Кулун тутар 13 күнүгэр Н.Г. Чернышевскай аатынан Бүлүүтээҕи педагогическай колледжка Арассыыйа үрдүк үөрэҕин бочуоттаах үлэһитэ уонна норуот үөрэҕириитин туйгуна, Саха Өрөспүүбүлүкэтин билимин үтүөлээх дийиэтэлэ, тыл үөрэҕин дуоктара, М.К. Аммосов аатынан Хотугулуу-Илиҥҥи бэдэрээлинэй үнүбэрситиэт саха тылын хаапыдыратын бэрэпиэссэрэ Гаврил Гаврильевич Филиппов 75 сааһыгар аналлаах «Ийэ тыл туруга: үөрэтии проблемалара» диэн тиэмэҕэ Төгүрүк остуол ыытылынна. Тэрээһиҥҥэ кытыннылар: М.К. Аммосов аатынан Хотугулуу-Илиҥҥи бэдэрээлинэй үнүбэрситиэт Арассыыйа Хотугулуу-Илиҥҥи норуоттарын тылларын уонна култуураларын үнүстүүтүттэн тыл билимин дуоктардара Г.Г. Филиппов, И.Е. Алексеев-Хомус Уйбаан, тыл билимин хандьытаата Г.И. Гурьев; улуус, куорат дьаһалтата, нэһилиэнньэтэ, саха тылын учууталлара, уһуйааччылар, устудьуоннар.
Тэрээһин үөрүүлээх чааһыгар улахан учуонай, ийэ тыл мындыр чинчийээччитэ Г.Г. Филиппов добун сааһын туолбутунан сахалыы алгыс сиэрэ-туома толорулунна, юбилярга истиҥ тыллаах эҕэрдэлэр этилиннилэр, уус-уран ааҕыы, ырыа-үҥкүү ананна. Бүлүү улууһун ытык киһитигэр “Бүлүү улууһа” муниципальнай тэриллии дьаһалтатын баһылыга С. Н. Винокуров “Бүлүү улууһун Бочуоттаах ветерана”, “Улуус сайдыытыгар өҥөтүн иһин” бэлиэлэри туттартаата. Бүлүү куорат дьаһалтатын быһылыга Нь.В. Афанасьев, үөрэппит учууталыгар махтанан туран, эҕэрдэ тылы эттэ. Саха Өрөспүүбүлүкэтин култууратын үтүөлээх үлэһитэ В.В. Васильев хора кэлэн үөрүүлээх көрсүһүүнү киэргэттэ.
«Ийэ тыл туруга: үөрэтии проблемалара» Төгүрүк остуол тула кэпсэтиигэ төрөөбүт тыл билиҥҥи туруга, сахалыы тылынан кэпсэтии уонна сурук тылын сайдыыта, уус-уран литэрэтиирэ уонна билиҥҥи ыччакка үөрэтии боппуруостарын туһунан санаа атастаһыыта мустубут дьон болҕомтотун тарта. Истээччилэр ытыктабыллаах Гаврил Гаврильевичка, Иван Егоровичка, Геннадий Игнатьевичка кэрэхсэбиллээх кэпсээннэрин иһин истиҥник махтаннылар, үтүө баҕа санааларын эттилэр.
М.Т. Гоголева
