Тохсунньу ый 18-19 күннэригэр биһиги үөрэхпит кыһатыгар Саха АССР култууратын үтүөлээх үлэһитэ, РСФСР норуотун үөрэҕэриитин туйгуна, методист – учуутал, Бүлүүтээҕи педагогическай училище преподавателэ Василий Иванович Санников төрөөбүт 80 сыллаах үбүлүөйүгэр араас тэрээһиннэр ыытылыннылар.
Олортон биирдэстэрэ “Тыл хонуута” литературнай-музыкальнай оонньуу буолла. Кыттыыны ыллылар: эбии үөрэхтээһин, школьнай, дошкольнай, коррекционнай бэдэгиэгикэ уонна физкультурнай салаалар устудьуоннара күрэхтэстилэр. Оонньуу уопсайа 7 түһүмэхтэн турда. Оонньууну ыытта Василий Иванович Санников үөрэппит оҕото, коллегата, бэдэгиэгикэ билимин кандидата Ульяна Федоровна Кондакова.
Оонньууга биһиги салааттан 6 киһилээх “Кэрэ эйгэ” диэн ааттанан хамаанда турда. Билиибитин-көрүүбүтүн барытын ууран туран оонньоотубут уонна кыайыылаах аатын сүкпүппүтүттэн астына-дуоһуйа тарҕастыбыт.
Биһиги бу оонньууттан биллибит: Василий Иванович сүрдээх уһулуччулаах преподаватель, айылҕаттан ананан кэлбит курдук, талааннаах киһи баара-суоҕа 42 сааһыгар олохтон туораабыт. Түмүккэ бары устудьуоннар бэйэлэригэр элбэҕи көрбүттэрэ-истибиттэрэ, туох эрэ саҥаны арыйбыттара буолуо диэн бигэ эрэллээхпин.
Барҕа махталбытын тиэрдэбит оонньууну тэрийбит, иилээн-саҕалаан ыыппыт Ульяна Федоровна Кондаковаҕа. Өссө даҕаны маннык оонньуулар буола туралларыгар баҕарабыт.
Василий Николаев,
Эбии үөрэхтээһин салаатын 271 бөлөҕүн устудьуона,
Эбии үөрэхтээһин салаатын сэбиэтин бэрэсэдээтилэн солбуйааччыта,
студпрофком бэрэсэдээтилин маҥнайгы солбуйааччыта.
