Билии күнэ

Үөрэхпит кыһата
Устудьуон аймах саҥатынан
Чугдаарйыа туолла.
Үөрэх дьыла саҕаланан
Үөрүү-көтүү буолла.

  Балаҕан ыйын бастакы күнэ – Билии аан дойдутааҕы күнэ. Бу кэмҥэ үөрэх-билии сырдык аартыгар сирдиир, үтүөҕэ-кэрэҕэ угуйар Н.Г Чернышевскай аатынан Бүлүүтээҕи педагогическай колледж 2017-2018 үөрэх дьыла арыллыытын үөрүүлээх быһыыга-майгага бэлиэтээтэ. Быйылга үөрэх дьылын уратытынан тапталлаах үөрэхпит кыһата 95 сылыгар ананар.

   Урукку сыллар үтүө үгэстэрин батан, саҥа үөрэх дьылын бастакы күнүгэр – биһиги үөрэх-билии аартыгар, бэйэлэрэ талан ылбыт идэлэригэр үөрэнээри Сахабыт сирин араас муннуктарыттан мустубут маҥнайгы куурска киирбит устудьуон доҕотторбутун уруйдуу-айхаллы көрүстүбүт.

    Саха өйдүүрүнэн, алгыс баһа сыалаах, оно буоллаҕына, сап саҕаттан салҕанан кэлбит ытык өйдөбүлбүтүн ытыктаан, утумнаан – саҥа үөрэх дьылыгар алгыстанан, арчыланан киирдибит. Алгыс сиэрин-туомун Владимир Спиридонович Николаев ыытта.

   Үөрүүлээх тэрээһини арыйда педагогика билимин кандидата, Саха сирин үөрэҕэриитин туйгуна, үөрэхпит кыһатын салайааччыта Семен Викторович Иванович. Быйыл ыаллыы сытар Үөһээ-Бүлүү улууһугар XX-һис үбүлүөйдээх “Манчаары оонньуулара” үрдүк тэрээһиннээхтик буолан ааста. Ол, курдук күрэхтэһиилэргэ биһиги үөрэхпит кыһатын устудьуоннара ситиһиилэхтик кыттан бэйэлэрин улуустарын чиэһин көмүскээтилэр. Кыттыбыт устудьуоннарга Семен Викторович эҕэрдэ суруктары уонна харчыннан бириэмийэлэри , ону таһынан үөрэхпит кыһатын уһуйааччыларгар эмиэ Российкай Федерация, Сахабыт Республикатын наҕараадаларын туттартаата. Тэрээһин ыалдьыттарынан буоллулар: Бүлүү улууһун баһылыгын дуоһунаһыгар кандидат Василий Тимофеевич Лукин уонна Бүлүү куората МТ дьаһалтатын аатыттан Матрена Антоновна Саввинова.

     Үөрэхпит кыһатын уһуйааччыларын аатыттан РФ норуотун үөрэҕэриитин туйгуна, РФ орто анал үөрэҕин бочуоттаах үлэһитэ, Саха Республикатын учууталларын учуутала Валентина Кузьминична Кириллина уонна устудьуоннар ааттарыттан студпрофком бэрэсэдээтэлэ Антон Михайлов.

     Ырыаннан-тойугунан киэргэттилэр Аан дойдуга, Россияҕа, Республикаҕа, улууска ыытыллыбыт ырыа күрэхтэрин кыайыылаахтара, лауреаттара, дипломаннара “ДЭГЭТ” вокальнай ансаамбыл. Амма Аччыгыйын тылларыгар, Христофор Максимов матыыбытыгар “Учууталбар” – диэн ырыаны бэлэх ууннулар. Салайааччы Саха сирин үөрэҕэриитин туйгуна Римма Васильевна Нестерова.

      Тэрээһин кэннэ үөрэхпит кыһатын историятын кэпсиир тьюторскай чаастар буоллулар.

  Тапталлаах үөрэхпит кыһата  тэриллибитэ 95 сылыгар аналлаах үөрэхпит дьыла аһыллыбытынан итии – истиҥ эҕэрдэ! Саҕаламмыт үөрэх дьылыгар барыгытыгар үрдүктэн-үрдүк ситиһиилэри, саҥаттан саҥа чыпчааллары дабайан иһэргитигэр.

 

Василий Николаев,

Эбии үөрэхтээһин салаатын устудьуона.