Золотая осень П. Н. Тобуруокап 2017

П. Н. Тобуруокап көмүс күһүнэ

Балаҕан ыйын 2 күнүгэр Үөһээ Бүлүүгэ Нам нэһилиэгэр норуот бэйээтэ П.Н.Тобуруокап  төрөөбүтэ 100 с. туолуутугар 5-с “Тобуруокап көмүс күһүнэ” икки күн устата тэрилиннэ. Педколледж түөрт киһиттэн састааптаах делегацияны ыытан сырытыннарда. У.Ф.Кондакова – салайааччы, Н.Мухина – 211, В.Николаев – 271, В.Аргунов – 311 гр.

Тэрээһиҥҥэ республика 17 улууһуттан кыттыыны ыллылар. Суруйааччылар народнай поэт И.В.Мигалкин, Саргы Куо – С.Гольдерова, Д.Наумов, Ю.Потапов —  Саргын, араас улуустартан айар бөлөхтөр олус көхтөөхтүк кыттан, хоһоон хонуутун хомуйа тартылар, айар тыл кэрэтин, хоһуйуу хомуһунун хотуулаахтык хоруттулар. Бастакы күн киэһэ 6 ч. дылы хоһоон ахсаабакка ааҕылынна. Былырыыҥҥы “Көмүс күһүн” түмүгүнэн кинигэ таһааран, хоһоонньуттар үөрүүлэрин үрдэттилэр. Хоһоонньуттар араас сиртэн кинигэ кэһиилээх кэлэннэр атыы-тутуу, атастаһыы дэлэй, бэлэхтэһии бэрдэ буолла.

Биһиги устудьуоннарбыт бэркэ кытыннылар, В.Аргунов хоһоонноро истээччилэр болҕомтолорун тарта. “Тыыппалаахтык суруйар оҕо эбит” диэн, суруйааччы буолуоҕар эрэллэрин биллэрдилэр. “Бастыҥ ааҕааччы” диэн В.Николаев хайҕанна, ырыаны толорууга эмиэ тэҥнээҕин булбата.

Киэһэ 6 ч. “Ырыа алааһыгар” П.Тобуруокап хоһоонноругар суруллубут ырыаны толорууга куоталастылар. Тоҕус мелодист – байаныыс кыттыылаах ырыа ыһыаҕа күһүҥҥү түүҥҥэ көрү-нары, көҕүлүттэн ылан, күлүмнэтэ оонньоото. Эмис Кэбээйи соботун, олгуйдарга буһаран, кимиэнэ минньигэһин, тотоойутун тобуллулар, ис үөрэтин, собо миининэн кыттааччылары күндүлээтилэр.

Иккис күнүгэр П.Н.Тобуруокабы оҕоҕо суруйуу маастарын быһыытынан ырыттылар, оҕолорго аналлаах хоһооннорун аахтылар. “Кэскил” хаһыаттан редактор Е.С.Иринцеева, отдел редактора В.П.Иванов сылдьан оҕо литэрэтиирэтигэр 20-с, 30-с с. кинигэ быыстапкатын туруоран, истиҥ-иһирэх кэпсэтиини таһаардылар, оҕо литэрэтиирэтин салгыы сайыннарыыга сыал-сорук туруордулар.

Тобуруокап көмүс күһүнэ сыллата кыттааччыта элбээн, көмүс дуйа халыҥаан иһэриттэн астынныбыт, улахан бэйээт туоната дириҥээн, суруйбута-айбыта, суолтата сотуллубакка, бүгүҥҥү күнү кытта тэҥҥэ хаамсарыттан эрэлбит күүһүрдэ, өлбөт-сүппэт айымньылары норуот умнубат, ааҕар, ыллыыр, таптыыр буоларын итэҕэйдибит уонна кини талааныгар дьон сүгүрүйэрин илэ харахпытынан көрдүбүт.

Золотая осень П. Н. Тобуруокап 2017 Золотая осень П. Н. Тобуруокап 2017 Золотая осень П. Н. Тобуруокап 2017 Золотая осень П. Н. Тобуруокап 2017 Золотая осень П. Н. Тобуруокап 2017 Золотая осень П. Н. Тобуруокап 2017