Багдарыын Сүлбэҕэ мэҥэ бэлиэ ыйанна

Багдарыын Сүлбэҕэ мэҥэ бэлиэ ыйанна

Муус устар 4 күнүгэр САССР үтүөлээх учуутала, Бүлүү училищетыгар 16 сыл дириэктэринэн үлэлээбит, номуукаҕа сахалартан ааттары үөрэтиини олохтообут Иванов Михаил Спиридонович – Багдарыын Сүлбэ орто дойдуттан барбыта 40 хонугун туолла. Бу күҥҥэ түбэһиннэрэн уолаттара Ньургун Багдарыын, Айдаар Уйбаныап, Эллэй Уйбаныап аҕалаатар аҕаларын үйэтитэн, мэҥэ бэлиэ оҥорторон 16 сыл үлэлээбит училищетыгар ыыттылар.

Бүлүүтээҕи педколледжка бу күн Учуутал түмэлигэр мэҥэ бэлиэни ыйаатылар, преподаватэллэр, устудьуоннар бу бэлиэ түгэҥҥэ мустан, Улахан учуутал, учуонай туһунан куорат дьаһалтатын баһылыгын солбуйааччы Петровв А.В., педколледж дириэктэрэ п.н.к. С.В.Иванов, үөрэнэччитэ У.Ф.Кондакова, училищеҕа бииргэ үлэлээбит үлэ бэтэрээнэ Е.М.Иванова, быйыл Багдарыын стипендиятын туппут  С.Егоров Багдарыын Сүлбэ норуотугар оҥорбут үтүөтүн бэлиэтээн, киэҥ ис хоһоонноох тыл эттилэр. Учуутал мусуойун эркинигэр “Училищеҕа үлэлээбитим – дьолум” диэн өйүгэр-сүрэҕэр иҥэрбит этиитин чиҥэтэн убаастыыр Улахан учууталбыт үөрбүт сэбэрэтэ ааһааччылар болҕомтолорун тарда туруоҕа.

Бу миитин кэнниттэн мусуойга киирэн Багдарыын Сүлбэ өр сыллаах чинчийэр үлэтин, олоҕун билиһиннэрэр быыстапканы, кинигэлэрин, презентацияны көрдүлэр, кини кэмигэр үлэлээбит үлэһиттэр, преподаватэллэр, киниэхэ үөрэммит устудьуоннар  ахтыыларын иһиттилэр. Устудьуоннар бэрт элбэҕи көрөн, истэн, кэрэ киһи туһунан үтүө өйдөбүлү иҥэриннилэр.

Добавить комментарий

Ваш адрес email не будет опубликован. Обязательные поля помечены *