Бу ый 21 күнүгэр Бүлүү педколлеһын бэрэстэбиитэллэрэ Саха иһитиннэрэр-көрдөрөр хампаанньатын «Үчүгэйиэн бу сиргэ” биэриитигэр ситиһиилээхтик кыттан кэллилэр. Биэрии сыала – соруга: колледж үлэтин-хамнаһын сонун өрүттэрин билиһиннэрии, 95 сылын туолуохтаах кырдьаҕас үөрэх кыһатын үбүлүөйүгэр бэлэмнэнии чэрчитинэн сырыттылар.
Биэриигэ алта преподаватель, араас кэмнэргэ бүтэрбит выпускниктар кытыннылар. Алта түһүмэҕинэн үлэ араас хайысхатын билиһиннэрдилэр:
У.Ф.Кондакова п.н.к. соторутааҕыта арыллыбыт Учуутал түмэлин үлэтин ис хоһоонун, ыытыллыбыт тэрээһиннэри билиһиннэрдэ. Сотору ыытыллыахтаах “Багдарыын ааҕыыларын” санатта. Биэриигэ САССР үтүөлээх учуутала, биллиилээх топонимист М.С.Иванов –Багдарыын Сүлбэ телефонунан эҕэрдэтин эттэ, 70-с сыллааҕы выпускник СӨ норуотун хаһаайыстыбатын үтүөлээх үлэһитэ В.С.Солдатова – Нанова мусуой тэрээһиннэригэр сылдьан көрбүтүн-истибитин туһунан санаатын эттэ.
“Далбар хотун” кулууп салайааччыта К.М.Семенова колледж үлэһиттэрэ иллэҥ кэмнэригэр күүстээх үлэ быыһыгар кэрэни тэнитэр араас хайысхаларга дьарыктаналларын сырдатта. Педагогическай үлэ ветерана М.Ф.Максимова преподавателлэри сахалыы иискэ үөрэтэр, ветеран И.Е.Петрова былыргы үҥкүүлэргэ, У.Ф.Кондакова “Сэгэйэ” уус-уран ааҕыы бөлөҕүн салайар, элбэх ахсааннаах коллекционердар (М.Е.Новикова, У.А.Васильева, Р.В.Нестерева, Ю.В.Петрова, З.М.Петрова уо.д.а.) киһини сөхтөрөр мунньунууларын быыстапкаҕа көрдөрбүттэрэ. Маны тэҥэ А.З.Павлова, Р.В.Нестерева ырыа ансамблларын тэрийэн үлэлэтэллэрин кэпсээтэ.
“Оптимист” кулууп салайааччыта Е.Р.Алексеев кырдьаҕастарга кыһамньыны билиһиннэрдэ. Араас конкурстар, биэчэрдэр, үбүлүөйдэри бэлиэтээһин, сир аһыгар сырытыннарыы, сылга иккитэ бородууктанан көмөлөһүү үгэскэ кубулуйбутун киэн туттан арыйда.
“Поиск” кулууп үлэтин эдэр преподаватель Н.А.Церенова билиһиннэрдэ. Эдэрдэр араас таһымнаах научнай-практическай кэмпириэнсийэлэргэ кытталлар, кыайыылааҕынан тахсаллар. И.И.Петрова п.н.к. салалтатынан сайын Тааттатааҕы пед. дьаарбаҥкаҕа олус таһаарыылаахтык кыттыбыттара, Лебедева Л.А., Гоголева А.В. Нам коллеһыгар ыытыллыбыт НПК кыайыылаахтарынан буолбуттара.
Дьокуускайдааҕы омук тылын үөрэтэр киин иһинэн колледжка филиал тэриллэн үлэлиир. Маны преподаватель У.А.Васильева иилээн-саҕалаан үлэлэтэр. Интэриэс күүстээх. Оскуола оҕолоро, устудьуоннар, оннооҕор улахан дьон утумнаахтык дьарыктанар буоллулар. Манна сонуна: омук тылын үөрэтиигэ Англияттан бэйэлэринэн кэлэн үөрэтэн бараллара ордук кэрэхсэнэр, сыаналанар. Бу биэриигэ манна кэлэн үөрэппит преподаватель Самья Бен Оаннес кытынна.
1968 с. выпускник, СӨ култууратын үтүөлээх үлэһитэ С.П.Григорьев биэриини училище устуоруйатыгар 60-с сылларга музыкальнай иитиигэ күүстээх үлэ барбытын тоһоҕолоон бэлиэтээтэ. Бу кэмнэргэ үөрэммит үс выпускник З.Петров матыыбыгар ырыа толорон көрөөччүлэри эҕэрдэлээтилэр.
Биэрии сүрүн түһүмэҕэ – устудьуоннар Калмыкия Элиста куоратыгар экскурсиялаан кэлбиттэрин түмүгэр туһуланна. Салайааччы С.Г.Мытник оҕолорун сырыыларын сыалын-соругун бөлөҕүнэн наардаан бэйэлэринэн кэпсэппитэ олус итэҕэтиилээхтик, сонуннук көһүннэ. Калмыкия государственнай университетын кытта бигэ дуогабар түһэрсэн выпускниктар бакалавриат бырагырааматынан 3-с куурустан үөрэхтэрин салгыы үрдэтинэр кыахтаннылар, 7 преподаватель аспирантураҕа киирдилэр.
Маны барытын бу айан өссө бигэргэттэ, бастакы сибээс олохтонно. Биэриигэ кыттыбыттарга, көрөөччүлэргэ бары махталы биллэрэллэр, ситиһиилээх буолуоҕу баҕараллар.
