1993 сыл балаҕан ыйын 2 күнүгэр Саха Өрөспүүбүлүкэтин бастакы бэрэсидьиэнэ Михаил Николаев Ийэ күнүн бэлиэтээһин туһунан 532 №-дээх ыйааҕы таһаарбыта.
Алтынньы 16 күнүгэр колледжпытыгар ийэ күнүн бэлиэтээтибит. Бу күн үнкүү, ырыа бэлэхтээтилэр уонна тэрээһини ыыттылар коррекционнай педагогика устудьуоннара, биһиэхэ ыалдьыттаатылар, бэйэлэрин эҕэрдэлэрин тиэртилэр бастакы нүөмэрдээх оскуола алын кылааһын үөрэнээччилэрэ.
Ийэттэн саҕаланар киһи төрдө, аал уот, алаһа дьиэ. Кинини кытта биһиги саамай истиҥ сырдык иэйиибитин ситимниибит. Ийэбит мөссүөнүн хас биирдии бэйэбит сүрэхпитигэр илдьэ сылдьабыт. Ийэбит күүстээх тапталын уонна кыһамньытын уурбутун хаһан да умнуо суохтаахпыт. Бу балысханнык сайдар үйэҕэ да, урукку да кэмҥэ ийэ баҕа санаата биир. Ол ханныгый? Оҕо. Ийэҕэ оҕо дьоло, ситиһиилээх буолара, олоххо бэйэтин миэстэтин булан, үлэлээн, дьиэ кэргэн тэринэн ,ыал –күүс буолара , бу Ийэҕэ саамай үрдүк наҕараада уонна махтал дии саныыбыт.
Оҕо – ийэ ыйа, күнэ, кэлэр кэскилэ, инникигэ эрэлэ. Ийэ тапталын билбит оҕолор олохторун устатыгар уолбат утахтаналлар. Ийэ – ыал ытык киһитэ. Кини күн курдук күндү, Айыы курдук амарах. Сир курдук сиэдэрэй. Кыыс анала ийэ буолуу.
Кунду күн-күбэй ийэлэрбит! Эһигини өссө төгул Ийэлэр күннэринэн итиитик-истиҥник эҕэрдэлиибит. Баҕарабыт эһиэхэ Сир үрдүгэр баар бары кэрэни, үчүгэйи, үлэҕитигэр ситиһиини! Ыарыы эһигинниин ыалласпатын, олоххут үөрүүнэн туоллун. Оҕолоргут тустарыгар ахсаабат кыһамньыгыт, сылаас тапталгыт, муударай сүбэҕит иһин барҕа махтал буоллун!
