Орто дойдуга киһини долгутар, үөрдэр, истиҥ иэйии таптал буолар. Бу истиҥ иэйии тулалыыр эйгэни кэрэһэлии дьиктик, ураты көстүү буолар.
Тапталлаахтар күннэрин көрсө олунньу 14 күнүгэр Н.Г.Чернышевскай аатынан Бүлүүтээҕи профессиональнай педагогическай колледжка “Төрөөбүт тылбытынан саҥарыаҕыҥ, сайдыаҕыҥ, сайыннарыаҕыҥ” проект чэрчитинэн алын сүһүөх учууталларын бэлэмниир салаа устудьуоннара, фронтовик-суруйааччы, поэт, прозаик, драматург Тимофей Егорович Сметанин төрөөбүтэ 105 сааһын көрсө саха былыргы кэпсээннэригэр олоҕуран суруллубут лирическэй драма “Лоокуут уонна Ньургуһун” испэктээх туруоран үгүс дьон биһирэбилин ыллылар. Оҕолор суруйааччы тылын хайдах баарынан уларыппакка бэйэлэрэ кыһаллан, турукка киирэн, театр диэн кэрэ эйгэ умсулҕаныгар уйдаран үөрэн-көтөн туран оонньоотулар. Үгүстэр сыанаҕа бастакы тахсыылара буолан олус долгуйдулар. Испэктээххэ кыттар устудьуон толкуйдуур, ырытар, анаарар дьоҕура сайдар, төрөөбүт төрүт тылынан санаатын сайаҕастык ылынар буолар. Салгыы бу проект чэрчитинэн маннык ааҕыылар, дьүһүйүүлэр өссө да туруохтара.
