Улуустааҕы куолу күрэҕэ

И.М. Гоголев – Кындыл төрөөбүтэ 90, Улуу Кыайыы 75 сылыгар, төрөөбүт тыл, сурук-бичик күнүгэр анаан оройуоннааҕы култуура уонна норуот айымньытын киинэ, «Алгыс» сынньалаҥ киинэ, Н.Г. Чернышевскай аатынан Бүлүүтээҕи педагогическай колледж, Каратаев аатынан олоҥхоһуттар уонна тойуксуттар народнай коллективтара тэрийиилэринэн олунньу 5 күнүгэр колледжка «Дьыаланы куолунан – куолуну дьыаланан» диэн улуустааҕы күрэх буолан ааста.
Күрэххэ уопсайа икки түһүмэҕинэн 12 киһи кытынна. Бастакы түһүмэх — дьиэҕэ сорудах – кыттааччылар бэлэмнэнэн кэлбит тиэмэлэрин 10 мүнүүтэ устата куолулаатылар. Иккис түһүмэх – тута хоһуйуу, кыттааччы талан ылбыт малын тута хоһуйан, уус-уран тылын бэргэнин, хомоҕойун көрдөрдө.
Дьүүллүүр сүбэ – Степанова Т.П., Иванова С.Т., Васильев С.В., Буслаева К., Баснаева Ф.П., Филатова Д. састаабынан үлэлээтэ.
Бу күрэххэ улуус көхтөөх ветераннара Дмитрий Седалищев, Каролина Харлампьева, Маргарита Соколова, Николай Николаев, Антонина Николаева кыттыыны ыллылар. Ону таһынан колледж устудьуоннара кыттан бэйэлэрин холоннулар: алын сүһүөх учууталларын бэлэмниир салаа бастакы кууруһун устудьуона Мярин Арыйаан «Бастыҥ куолуһут», коррекционнай педагогика салаатын иккис кууруһун устудьуона Салгынова Анита «Эрчимнээх тыллаах куолуһут», эбии үөрэхтээһин салаатын иккис кууруһун устудьуона Томский Елисей «Бэргэн тыллаах куолуһут», оскуола иннинээҕи оҕолору бэлэмниир салаа бастакы кууруһун устудьуона Константинова Күндээрэ «Итэҕэтиилээх куолуһун» номинацияҕа тиксэн үөрүү өрөгөйүн биллилэр.
Олус сэргэх тэрээһин буолан ааста. Сахалыы сайаҕастык саҥаран үөрдүлэр – көттүлэр, күөн көрсөөччүлэр урут билбэтэхтэрин билэн, сорохтор урут истибэтэхтэрин истэн, бэйэлэрин билиилэрин кэҥэтэн тарҕастылар.

Саргылана Осипова