Бүлүү эбэҕэ сүгүрүйүү күнэ

Иитэн-аһатан олорор ытык Бүлүү эбэбитигэр сүгүрүйүү күнэ   Д.Г.Макаров аатынан пуонда салайааччыта П.Г.Макарова, пуонда  сэбиэтин чилиэннэрэ көҕүлээһиннэринэн уонна  быһаччы тэрийиилэринэн   сылын ахсын ыам ыйын 25 күнүгэр ыытыллар. Быйылгы тэрээһин “Бүлүү байанайдаах балыксыттара” диэн Бүлүү балыгын сураҕырдыбыт удьуор  балыксыттар тустарынан кыраайы үөрэтэр түмэлгэ туруоруллубут быыстапкаттан саҕаланна. Маны тэҥэ оскуолаларга, детсадтарга, лааҕырдарга  уруһуйуттан саҕалаан, ырыаҕа-тойукка тиийэ араас хабааннаах  үлэ салҕанан бара турар. Эбэ күнэ кытылга элбэх киһини түмтэ, оройуон мунньаҕын депутаттара П.С.Томская, Е.К.Чиряев, В.Н.Платонов кытыннылар. Бүлүү куоратын баһылыга Нь.В.Афанасьев дьон сэҥээриитин ылбыт үтүө үгэскэ норуот түмсүүлэрэ актыыбынайдык кытталларын бэлиэтээн туран, ытык эбэҕэ сүгүрүйүү, айылҕа харыстабылыгар хас биирдии киһи кыттыһара, ону көҕүлүүргэ, тэрилтэ  салайааччылара  киэҥ далааһыннаах, ситимнээх үлэни ыыталлара наадатын эттэ. Бу күн өрүү буоларын курдук, Н.Г.Чернышевскай аатынан педколледж  коллектива куорат күөх эргимтэтин, уулуссалары, кытыллары кэрийэн, баһаам элбэх  сыыһы- бөҕү хомуйда, кууллаан утары  тиэйиини директоры иитэр үлэҕэ солбуйааччы Л.В.Докторова, хаһаайыстыбаннай чаас салайааччыта В.И.Поскачин бэркэ тэрийдилэр.  “Үрдэл” киин иһинэн устудьуоннар түмсүүлэрин үлэтин сүрүннээччи  С.Г.Мытник салайыытынан коррекционнай педагогика,  алын сүһүөх кылаастар учууталлларын бэлэмниир, дошкольнай  салаалар устудьуоннара  «Балык ыраас ууга үөскүүр” диэн арт -акциялаах таҕыстылар.  Үлэһиттэртэн преподавателлэр  Е.В.Басова, Н.В.Васильева, комендант Никифоров И.Ю. күүскэ өйөөтүлэр, көмөлөстүлэр.

Устудьуоннар айылҕа көмүскэлигэр анаабыт ис санааларын Бүлүү эбэ балыктарын ньэмиэтигэр уруһуйдаан, дьон-сэргэ дьүүлүгэр таһаарбыттарын  кытылга мустубут барыта сэҥээрдэ Клавдия Мыреева бэйэтин уруһуйдарын туһунан маннык кэпсиир: “Мин төрүт Бүлүү оҕото Бүлүү эбэбин Хотун Бүлүү уобарастаатым, эбэ син-биир тыыннаах дууһа, кини сүрэҕин ытатымыаххха, харыстыахха, киниэхэ төрөппүт ийэ курдук сыһыаннаһыаххха, айылҕа саамай мааны көтөрдөрө-кыталыктар Бүлүү эбэм хабайар хаба ортотугар түһэн үҥкүүлүү сылдьыахтарын эрэнэ  көрөбүн, ону оҥордум”. Иванова Сахая уруһуйугар: “Мин Бүлүү эбэ оҕотобун, эбэм уу нуурал   долгунугар  оҕо сааспыттан сөтүөлээбит, кырылыы тохтор кумаҕар сүүрбүт ахан күннэрбин ойуунан кэпсээтим, эбэм киртийиитин,  санаа-оноо  бөҕөҕө ыга баттатан турарын харааста көрөрбүн, баҕа санаабар эбэм барахсан чөлүгэр түһэн, ырааһыйан улуутуйарын, кини  тула көтөр-сүүрэр, дьон-сэргэ үөрүүлэрин,үҥкүүлэрин көрдөрдүм”.  Максимова Ванесса: “Мин Горнай улууһуттан сылдьабын, уруһуйбар айылҕа чөл туруктаах буолара  хас биирдии киһиттэн улахан тутулуктаах, кини тулалыыр эйгэтин кырыы хараҕынан

көрдөҕүнэ, холуонатык  сыһыаннастаҕына алдьатыы, кэхтии саҕаланнаҕа ол диэн ис хоһоонноотум”.  “Матаркина Анжелика  диэммин, Чурапчыбын,  уу-олох төрдө, тыынар тыыннаах барыта ырааска, кэрэҕэ  дьулуһар, ол курдук бу мин балыгым эмиэ ыраас ууга үөскүүр айылгылаах, мин ону дьүһүйдүм”. Николаева Сардаана бэйэтин ураты көрүүлэрин Бүлүү дьэҥкир уутун ыраас таммахтарын нөҥүө кэпсээбит. Иванова Христина: “Уруһуйбар төрөөбүт эбэм көмүс мөһүүрэнэн арылыйар кэрэтэ, солотуулаах урсуна, солко суугун долгуна өрүү көтөрү-кыылы угуйа, чэбдигирдэ турдун, чуумпу ыраас кытыллара, бэс чагдата  көтөр саҥатынан, ыччат ырыатынан, мичээринэн туола туруохтун диэн баҕа санаабын түмтүм”.