«Үбүлүөйү уруйдаан кэлиҥ, сылдьыҥ, ыалдьыттааҥ!»

Бүлүүтээҕи педагогическай колледж 95 сыллаах үбүлүөйдээх тэрээһин иккис күнэ үөрүүлээхтик, үрдүк көтөҕүллүүлээхтик саҕаланна, хомус тыаһа доҕуһуоллаах, сахалыы үҥкүү арыаллаах, алгыһынан аһылынна. Ыҥырыылаах ыалдьыттар, урукку сылларга училищаны бүтэрбиттэр, билигин үөрэнэ сылдьар студеннар, колледж үлэһиттэрэ, бар дьон бары мустан үөрэ-көтө үбүлүөй иккис күнүн урааҥхайдыы уруйдуу сахалыы айхаллыы көрүстүбүт.

“Долгуйа күүтэр уһуйааччыбыт…” диэн ааттаах темаларынан араас сылларга үөрэнэн бүтэрбиттэр аһаҕас уруоктары, мастер-кылаастары ыыта тарҕастылар.

Тетелева Муза Николаевна- 2005 сыллааха спец.дошкольнай салаатын бүтэрбитим. Кураторым — Петрова Ирина Егоровна этэ. Бүлүү Бөтүҥүттэн төрүттээхпин. Бүлүү куоратыгар 1983 сылтан «Солнышко» детсадка үлэлиибин. 45 сааспар Бүлүү училищетыгар үөрэнэ киирбитим, эбии музыкальнай руководитель диэн идэни   ылбытым, ол кэниттэн иитээччинэн үлэлиибин.

Үксүн баайыынан дьарыгырабын. Бүгүн сонун, биир дьикти “Сухое валяние” диэн мастер-кылаас көрдөрө, ыыта кэллим.  Бу саҥа холонон оҥорор үлэм буолар.  Биһигини үөрэппит учууталларбытынан буолаллар: Елизавета Александровна, Римма Васильевна, Варвара Иннокентьевна, Зоя Николаевна, Анна Николаевна.

Иванова Нина Михайловна диэн буолабын. Үөһээ Бүлүүттэн сылдьабын. Оҕо санаторийыгар үлэлиибин. Бүлүү колледжын Дошкольнай отделениятын 2017 сыллаахха бүтэрбитим. Кураторым Местникова Люция Николаевна буолар. 25 буолан үөрэммиппит. Үөрэппит учууталларбытынан буолаллар: Зоя Николаевна, Мария Прокопьевна уо.д.а.

Дьарыктыыр оҕолорум араас сааастаахтар, барыларын бииргэ дьарыктаабыт киһи диэммин Мария Маттессорова методынан «Безгор» доска оҥорбутум.  Онно 4 окошкалаабытым. Счеты иилбитим, телефоны, электричестваны кытта билистиннэр диэн лампочкалары, кнопкалары иилбитим уонна “Сюрпризный момент” диэммэр мультик геройдардарын иилбитим. Бу дуосканы көрөн оҕо дьүһүнү араара үөрэнэр уонна суоттуурга үөрэнэр, ону тэҥэ мультик геройдарын билэ-көрө үөрэнэр, ону тэҥэ тутара-хабара эмиэ сайдар, барытыгар туһалаах. Араас саастаах оҕолорго сөптөөх.

Николаева Розалия Семеновна — 1968 сыллаахха бүтэрбитим, номнуо 50 сыл ааста. Евгений Романович уонна Ульяна Федоровналааҕы кытта үөрэнэн “Көмүс выпусктар” буолабыт. Мин бэйэм Сунтаар Кутанатыгар үлэлиибин. Педагогическай үлэ ветеранабын, Саха республикатын үөрэҕириитин бочуоттаах үлэһитэбин уонна 5 кинигэ авторабын, оҕолорго аналлаах 3 кинигэлээхпин, улахан дьонҥҥо  2 кинигэлээхпин.

Бүлүү училищатыгар 30 буолан киирбиппит. Кураторым: Атласова Вера Еремеевна диэн этэ, кинилэргэ махтал бастыҥын тиэрдэбин. Алын кылаастары бэлэмниир салааны бүтэрбиппит (школьное отделение).

Выпускниктар буолан үөрэ-көтө көрсүөхтээхпит. Бииргэ үөрэммит оҕолорбор дьылҕаҕыт сулуһа дьолунан сыдьаайдын бука барыгытыгар, айыыһыт алгыһа арчылыы сылдьыахтын диэн, баҕа санаабын тиэрдэбин. Эдэр ыччакка өйдөһүү, өйөһүү өрүүтүн үөрдүөхтүн, баҕа санааҕыт барыта туола турдун диэн этиэхпин баҕарабын.

Куличкина Любовь Васильевна диэммин. Школьнай отделенияны 1975 сыллаахха бүтэрбитим, физкультурнай отделения аан бастаан аһыллыбыта ол сылга. Кураторым: Прокопьева Тамара Николаевна этэ.

Студент сылдьан РДК-ҕа хас суббота аайы биэчэрдиирбитин өйдүүбүн, ахтабын-саныыбын. Училищаҕа сылдьан саамай умнуллубат түгэннэрим диэн олус элбэх, олус мэник, көрүдүөс саастарым онно ааспыттара, билигин ахтан-санаан ааһабын.

Биир түгэни кэпсиэхпин баҕарабын: Козлова Полина, Герасимова Фая диэн дьүөгэлэрдээхпин. Уруокка саамай түгэх паартаҕа олорооччубут. Полинабыт утуйан хаалар. Ону учууталбыт Попов Роман Дмитриевич уруога этэ.  Арай ыҥырда, Козлова Полина диэтэ кыыспыт истибэт, ону, «Полина, эйигин ыҥырар» — диэтим. Кыыһым  тыыллаҥнаата уонна: “Ээ, чэ бээ”- диэн баран утуйан хаалла.

Ол курдук Бүлүүм кыһатыгар баҕарыам этэ үрдүк ситиһиилэри, дьолу-саргыны, ыстаал курдук доруобуйаны, учууталларбар улахан барҕа махталбын тиэрдиэхпин баҕарабын.

Ситиһиим диэн “Учитель учителей”ааты ылбытым буолар, 40 сыл учууталлаабыппынан 100000 солкуобайдаах граҥҥа тиксибитим.

Нахаров Егор Михайлович –диэн буолабын. 1957 сыллаахха бүтэрбитим, школьное отделение. Бэйэм Бүлүү Халбаакытыттан сылдьабын. Группабытыгар 25 буолан киирбиппит. Дьокуускай куоракка билигин даҕаны университекка үлэлиибин.

Ситиһиим диэн, үлэм өттүнэн буолар, салайыы, тэрээһин. Республика штабыгар үлэлээбитим, республиканы барытын кэрийбитим. Маҥнайгы академик Ларионовка солбуйааччынан үлэлээбитим. Университетка деканынан үлэлээбитим, философскай наука докторабын, профессорбын, академикпын. Бу училищаттан мин соҕотох академик буолабын. Эдэр сылдьан дьарыгырар этим сүүрүүнэн, 1 разрядтаахпын.

Корякин Климент Кириллович — 1957 сыллаахха бүтэрбитим. “4Б” группа диэн этибит. Группабыт эйэлээх, общественнай үлэҕэ кыттыһар, активнай позициялаах этибит. Маҥнайгы кураторбыт- Золотарева Мария Васильевна. Ол кэнниттэн — Семен Петрович, Вера Семеновна буола сылдьыбыттара.

Ситиһиим диэн — Правительстваҕа үлэлии сылдьыбытым буолар. Улуу кыайыы 50 сылын бэлиэтиир юбилейнай хамыыһыйаҕа бэрэссэдээтэлинэн үлэлии сылдьан, Саха сирин олохтоохторо улуу кыайыыга киллэрбит кылааттарын үөрэтиигэ анааммыт 10 томнаах өйдөбүнньүк кинигэ оҥорон таһаарбыппыт. Ол кинигэҕэ кылаабынай редакторынан анаабыттара. Ол кинигэ тахсан үйэ саас тухары суругунан өйдөбүнньүк буолар. Саха сириттэн сэриигэ баран өлбүттэри, эргиллэн кэлбиттэри уонна үлэ ветераннарын, сэрии оҕолорун тустарынан бу кинигэ оҥоһуллан тахсыбыта.

Баҕа санаабыт туолан училищабытын көрөн астынныбыт. Оҕолорго саамай главнайа үөрэхтээх, сайдыылаах киһи уонна доруобай буолуҥ диэн этиэм этэ. Эһигини көрөн үөрэбит-көтөбүт. Үөрэххит кыһатын куруутун үөрдэ туруҥ.

Федоров Петр Семенович — 1965 сыллаахха биһиги Бүлүүтээҕи педучилища аанын аан маҥнай атыллаабыппыт. Ньурбаттан төрүттээхпин. Баппаҕай оскуолатын бүтэрэн баран, 65 сыл аннараа өттүгэр үөрэнэ диэн, экзамен туттарсан киирбиппит. Сатыы 25 көһү хааман тиийбиппит. Марфа Семеновна Гаврильевалыын тэбис тэҥҥэ хааман, аргыстаһан кэлтим, наһаа кэрэхсэбиллээх, өйдөбүллээх. Туох баар учууталларбыт барыта кэлии дьоннор этэ. Советскай союз эдэр специалистара үлэлиир этилэр. Кинилэр бэйэлэрин эрэ предметтэринэн муҥурдаммаккалар, культураларын, олоххо, дьоҥҥо-сэргэҕэ сыһыаннарын көрөн-истэн, иитэн-такайан үөрэппиттэрэ. Ити биһиги инники олохпутугар суолталаах этэ, кинилэр курдук эмиэ биһиги үчүгэйдик үлэлээн-хамсаан, бэйэбит республикабытыгар туһалаах дьон буолан бигэ эрэллээх бу училищаны 1957 сыллаахха бүтэрэн республика араас муннуктарыгар үлэлии тарҕаспыппыт. Холобур: Бүлүү куоратын олохтооҕо, Иван Николаевич Гаврильев диэн, саамай авторитеттаах преподаватель, бочуоттанар киһи, билиитэ көрүүтэ киэҥ. Ону тэҥэ Марк Николаевич Жиркову кытта бииргэ алтыһан, үөрэнэн. Туох да үчүгэй музыкант буолбута. Сайдыылаах, үчүгэй дьоннор үлэлээн хамнаан ааспыттара.

Бу Бүлүү училищата кэнники колледж буолбут, элбэх салааланан, учуутал эрэ идэтинэн муҥурдаммакка, араас салайар үлэҕэ иитэн таһаарбыт, республикаҕа улахан кылааттаах педколледж буолар.

Ситиһиим диэн, 1975 сыллаахха Нерюнгри куоракка комсомолу, партияны тэрийсибитим, салайбытым, тутуутугар кыттыбытым.