Ыччат айанныыр, ыыра кэҥиир

Бүлүү педколледжын студеннара Москва — Санкт Петербург  куораттарынан киэн программалаах туурга баран кэллилэр.  Бастатан туран, студеннарга  Республика бастакы Президена  Михаил Ефимович Николаевтыын көрсүһүү долгутуулаах түгэнэ тосхойбута.

Михаил Ефимович Бүлүү коллеһыгар 3 этээстээх бэртээхэй таас дьиэни туттаран, Бүлүү түөлбэ эрэ буолбакка  Республика бүттүүнүн   ыччата үөрэнэр-сайдар усулуобуйатын олохтоохтук тэрийбит үтүөтүн хас биирдии Бүлүүгэ үөрэммит устудьуон өрүү махталынан ахтар. Москваҕа Республика Представительствотыгар Юрий Степанович Куприяновтыын көрсүстүлэр. Төгүрүк остуол тула  үөрэх,  сайдыы,  ыччат политикатын  туhунан санаа атастастылар, колледжтарын үлэтин кэпсээтилэр,  95-с сыллаах үбүлүөйдэрин көрсө аны сайын Москваҕа, Санкт Петербурга   буолуохтаах ыһыах тэрээһиннэригэр кыттар былааннарын тириэртилэр. Москваҕа үөрэнэр биир саастаахтарын, үөлээннээхтэрин,  «Айтал» диэн  устудьуоннар түмсүүлэрин  лидердарын кытары алтыстылар, Кинилэр киин куораттарга cаха ыччата хайдах тэринэн — дьаhанан сылдьалларын,  үөрэхтэрин   туһунан  ирэ-хоро  билиhиннэрдилэр, улахан киэҥ  эйгэҕэ тахсар  билиҥҥи кэм ирдэбилэ  диэн сүбэлээтилэр, биһиэхэ  үөрэнэ кэлин диэн ыҥырдылар,  биһиги көрсүөхпүт,  бэйэбит кэккэбитигэр үөрэ -көтө  ылыахпыт диэтилэр.

Айан  биир саамай интэриэһинэй түгэнинэн алтынньы 14-гэр   Саха республикатын былааҕын күнүгэр түбэһиннэрбит курдук   аан дойду үрдүнэн 19-үс төгүлүн ыытыллар ыччат фестивалын арыллыытыгар карнавальнай шествияҕа кыттан ылыы  үөрүүтэ-көтүүтэ буолла. Инньэ гынан Бүлүү педколледжын устудьуоннара Аан Дойду ыччатын cомоҕолооһун, норуоттар икки ардыларыгар бигэ ситими олохтооһун курдук үтүө санаалаах  Ыччат 19-үс фестивалын историятыгар киирдибит диэн киэн тутта кэпсиэхтэрин сөп. Бу парад – шествие   Кыһыл болуоссат таһыттан   Васильевскай спусктан күнүс 3 чаастан саҕаламмыта.   

Оттон салгыы    оҕолор  Кыһыл болуоссакка турар  ГУМ-на арыллыбыт Улуу Октябрьскай революция 100 сылыгар аналлаах   Аан дойду таһымнаах «Муода – норуокка» диэн выставкаҕа кытыннылар.  Кыргыттар колледжка улэлиир   «Сандаара»  диэн муода  студияларыгар оҥоһуллубут  хотугулуу матыыптаах  киэргэллэри көрдөрдүлэр  уонна   выставка  Лауреаттарынан буоллулар. Маны таһынан Россияҕа экология сылыгар аналлаах экологическай выставкаҕа сырыттылар.

Санкт Петербурга тиийэн Республика Представительствотыгар «Сайдыс» студеннар түмсүүлэрин бастыҥ ыччаттарын кытары көрүстүлэр,    СанктПетербург 2-ис нүөмэрдээх комбинированнай оҕо уһуйааныгар,  Василеостровскай    оройуонун  106 –ыс  оскуолатыгар музейга,  2-ис кылаастарга  аһаҕас уруокка, дьарыктарга  сырыттылар, опыт атастастылар. АИ Герцен аатынан университекка, Хотугу норуоттар институттарыгар үөрэнии усулуобуйатын билистилэр.

Студеннар Бүлүү педколледжыгар 43 сыл математика учууталынан үлэлээбит, билигин Москва куоракка бочуоттаах сынньалаҥҥа олорор педагогическай үлэ ветерана, Үлэҕэ килбиэнин иһин мэтээл кавалера, РСФСР норуотун үөрэҕириитин туйгуна, Орто анал үөрэхтээһин туйгуна  Крылова Валентина Ивановнаны 80-уон cааһын туолар ытык бэлиэ үбүлүөйүнэн итиитик-истиҥник эҕэрдэлээтилэр,  көрсүһүү дьоро киэһэтин Валентина Ивановна уола Ил — Түмэн депутата Окоемов Юрий Константинович тэрийдэ.

Официальный сайт Вилюйского педагогического колледжа