Педколледж 95 с. үбүлүөйүгэр СГУ-ну кытта сибээһи ахтан ааһар тоҕоостоох. Балаҕан ыйын 15 күнүгэр Ил Түмэн ыҥырыытынан Нам улууһун Хатырык нэһилиэгэр баран кэллим. Бу күн П.А.Слепцову кэриэстээн доҕотторо, аймах — билэ дьоно мрамор уҥуох туруордулар, М.Аммосов аатынан мусуойга улахан тэрээһин ыытылынна. Онно историческай наука кандидата, ХИФУ саха тылын, култууратын үнүстүүтүн доцена П.А.Слепцов үс кинигэтин билиһиннэрэр түгэҥҥэ кытынным. П.А.Слепцов баара буоллар, 60 сааһын туолан үөрүөх-көтүөх эбит. Кини аҕатын туһунан, олус бэртээхэй кинигэни суруйан хаалларбытын дьоно-сэргэтэ олус чугастык ылыннылар, бэйэтин туһунан “Бичик” кинигэ издательствотын “Саха киэн туттар дьоно” серияҕа тахсыбытын билистибит, үһүс кинигэ – Платон Алексеевич монографиятын, научнай ыстатыйаларын хомуурунньуга.
Намнар утуу-субуу икки улахан ученайдарын сүтэрдилэр. Г.Г.Левин – аан дойдуга биллэр тюрколог. Кини саха тыла түүр тылыгар маарынныыр өрүттэрин руна суруктарын үөрэтэн, ол ис хоһоонунан дакаастаабыт филологическай наука доктора.
П.А.Слепцов – саха омук ыал буолар үгэстэрин чинчийбит историческай наука кандидата.
Кинилэр иккиэн БПК-СГУ ситими олохтооһуҥҥа, инники күөҥҥэ киирсэн, элбэхтик сүүрбүт-көппүт, лекция бөҕөнү аахпыт ученайдарынан буолаллар. СГУ бэрэстэбиитэлистибэтин сайыннарыыга, педколледж преподавателлэрин, куорат олохтоохторун билии-көрүү өттүнэн сэргэхситиигэ улахан сырдатар үлэни ыыппыт дьоннор. Олохтоох тэлэбиисэр биэриилэригэр кыттан, көрөөччүлэрдиин сэһэргэһэн саха тылын, култууратын сайдыытын ырытыһар этилэр.
Бүлүүнү олус сөбүлээбиттэрэ, лекция ааҕа кэлэллэрин олус кэтэһэллэр этэ. Устудьуон аймах билиниитин, махталын ылбыттара: туохха барытыгар олус көхтөөх этилэр: Герасим Герасимович көрдөөх кэпсээннэрин, Платон Алексеевич эрчимнээх үҥкүүтүн, намыын ырыаларын ама ким умнуоҕай?!
Ол бэйэлэрэ эдэр саастарыгар, соһуччу олохтон туораан, барыбытын соһуттулар, хомоттулар. Дьылҕа, оҥоһуу – чаас оннук буоллаҕа… Ол эрэн кинилэр сырдык мөрсүөннэрин биһиги үйэ-саас тухары сүрэхпитигэр сөҥөрдөн илдьэ сылдьабыт, умнубаппыт.
