Колледжка М. Н. Жирков күнэ

Колледжка М.Н.Жирков күнэ

Муус устар 28 күнүгэр Н.Г.Чернышевскай аатынан Бүлүүтээҕи педколледжка саха бастакы профессиональнай композитора, РСФСР, САССР искусствотын үтүөлээх деятелэ М.Н.Жирков 125 сылын бэлиэтиир анал күн ыытылынна.
Бу күн сарсыарда Учуутал түмэлигэр, композитор үлэлээбит дьиэтигэр, мусуой-уруок ыытылынна. Уруогу СӨ үөрэҕин туйгуна Р.В.Нестерева уонна аҕыйах хонуктааҕыта Новосибирскай куоракка ыытыллыбыт Россия устудьуоннарын күрэҕэр М.Н.Жирков айар үлэтин дакылаатынан билиһиннэрэн III миэстэни ылбыт В.Васильев ыыттылар. Сүүстэн тахса саастаах ытык уораҕайга хаһан эрэ сүдү музыкант ыллаан, муусукаҕа оонньоон ыччаты үөрэппит дьиэтигэр, билигин даҕаны бөдөҥ-садаҥ киһи күлүгэ көстөргө дылы… Учууталлар композитор олоҕун биир-биир ырытан, биэс бөлөҕүнэн түмүк оҥорон М.Н.Жиркову саха музыкатын тэрийээччи, чинчийээччи, айааччы, толорооччу, культуролог быһыытынан арыйдылар. Кини феномена – олоҥхону операҕа кубулутан суруйуута буоларын ыйдылар. Уруок табылынна, элбэх саҥаны-сонуну биллэрдэ.
Бу күн колледжка М.Н.Жирков музыката ньиргийдэ, композитор ырыаларын толорууга, конкурус биллэриллэн, тэрийээччилэр сүүрдүлэр-көттүлэр. Конкурус иннигэр презентация көмөтүнэн сэргэх бэсиэдэлэри ыыттылар: В.Васильев Россия таһымыгар кэмпириэнсийэ түмүгүн кэпсээтэ, У.Ф.Кондакова училище преподавателэ САССР култууратын үтүөлээх үлэһитэ В.И.Санников 70-с сылларга 10 сылы быһа матырыйаал мунньан, научнай чахчылары хомуйан М.Н.Жирков айар үлэтин көрдөрөр музей тэрийбитин иһитиннэрдэ. Бүлүү куоратыгар, училищеҕа М.Н.Жирков сахпыт музыката элбэх көлүөнэ музыканнары, ырыаһыттары иитэн таһаарбытын преподаватель, РФ үтүөлээх учуутала Е.Р.Алексеев итэҕэтиилээхтик арыйда.
Устудьуон оҕолор М.Н.Жирков айымньыларын инструментальнай ансамбль толоруутугар иһитиннэрбиттэрэ сонун буолла.
Ол кэннэ конкурус саҕаланна. Биирдиилээн, ансаамбылынан толоруулары иһиттибит. Устудьуоннартан С.Корякина – 282 гр. “Күрүлэс күргүөм күннэргэ”, преподавателлэртэн В.Кириллина “Күөрэгэй”, ансамбыллартан А.Захарова салайааччылаах “Кырыымпа” ансаамбыл “Мааппа ырыатын” толорон 1-кы миэстэни ыллылар.
Биэчэр сонун көстүүтэ М.Жирков олохтообут инструментальнай оркестр доҕуһуолунан былыргы бальнай үҥкүүлэри көрүү буолла. Манна “Айыллаана” үҥкүү ансаамбылын кыттыылаахтара, колледж ветеран-преподавателлэрэ И.Петрова, Н.Парникова тэҥнээхтэрин булбатылар, ыччаттары үҥкүүгэ көҕүлээтилэр.
Колледж ветеран – преподавателэ Б.Михалев М.Жирков “Гастеллотын” сахалыы-нууччалыы толорон көрөөччүлэри сэргэхситтэ.
Колледж библиотеката М.Н.Жирков айар үлэтин көрдөрөр баай ис хоһоонноох кинигэ быыстапканы оҥорон туруорда.
Биэчэртэн бары астынан, элбэҕи билэн-көрөн, туортаах итии чэй иһэн, санаа атастаһан үөрэн-көтөн тарҕастылар.