Саха сиригэр 2013 сылтан Ырыа күнэ ыытыллар. Бу оҕо, ыччат, улахан дьон, болуоссаттарга түмсэннэр, ырыа ыһыаҕын тардаллар. Ыам ыйын 24 күнүгэр Мэҥэ Хаҥалас улууһугар биллэр мелодист маҥнайгы таптал туһунан нарын ырыаны хаалларбыт А.Дмитриев – Чүмэчи аатыгар республиканскай ырыа ыһыаҕын ыстылар.
Бу күн Бүлүүтээҕи педколледж ырыаны таптыыр ыччата, уһуйааччылара, сарсыардаттан Ырыа күнүн биллэрэн, ыллаатылар-туойдулар, оонньоотулар-көрүлээтилэр. Ырыа күнэ ыччаты уруок, эксээмэн быыһыгар сынньатар тэрээһин быһыытынан ыытылынна.
Сарсыардаттан салаалар переменалары үллэстэн ырыа дьоллоох туонатын тардан кэбистилэр. ДО-лар “Дьоллоох оҕо саас”, ШО-лар “Төрөөбүт дойду”, ОКП-лар “Таптал”, ИО, ФО салаалара “Аныгы ыччат ырыата” тиэмэлэргэ ырыалары ньиргитэн истилэр.
Киэһэ ырыаны таптааччылар мустан ырыалаах оонньууларга кыттан, дуоһуйа сынньаннылар. Ырыаһыттар, ырыалары билиигэ, соһуччу сорудаҕынан ыллааһыҥҥа, маассабай оонньууларга көхтөөхтүк кытыннылар: уһуйааччылар да, улаханнык хаалсыбакка, түсүһэн истилэр. Ырыа сыабыгар саамай уһун сыап “Ньургуһун” туһунан ыллааһыҥҥа субулунна. Ол эрэн түмүгэр СӨ култууратын үтүөлээх үлэһитэ, музыка преподавателэ А.З.Павлова бэйэтин матыыбыгар икки ырыаны толорон тэҥнээҕин булбата. Ыччаттарбыт да ньургуһун туһунан элбэх саҥа ырыалары иһитиннэрэн сөхтөрдүлэр.
Ырыа-саҥа күн саһарҕата, кэлэр кэм бараммат махтала. Ырыалаах олох-уйгу-быйаҥ, этэҥҥэ олох туоһута. Ыччаттарбыт Ырыа күнүгэр сүргэлэрэ көтөҕүллэн, үөрэн-көтөн кытыннылар, Ырыа күнэ колледжка сыллата ыытылларын саарбаҕалаабаппыт. Бу күн ордук көхтөөхтүк кытыннылар: “Кырыымпа” кыргыттар ансаамбыллара, Аян Саввинов, Д.Ачикасова, Н.Васильева, С.Иванова, С.Петрова, эбии идэҕэ үөрэтэр салаа, начальнай оскуола учууталлаарын бэлэмниир салаа устудьуоннара.
Музыка үөрэҕин уһуйааччылара Р.В.Нестерева, О.Н.Ким, А.З.Павлова, Е.Е.Евдокимов, У.Ф.Кондакова спонсордаан, кыттааччылар сэмэй бэлэхтэри тутан үөрдүлэр-көттүлэр.
Преподавателлэр Е.Р.Алексеев, А.С.Петрова, К.М.Семенова уо.д.а. көхтөөхтүк кыттан, ырыаны таптыылларын, олохторун аргыһа оҥостоллорун бигэргэттилэр.
“Бүгүҥҥү ырыа-бүгүҥҥү күнү, олоҕу туойар, уруйдуур, ыччаттарбытын кэрэҕэ, сырдыкка, үрдүккэ угуйар сүдү аналлаах”, — диэн, п.н.д. Ил Түмэн дьокутаата А.А.Григорьева этиитэ оруннааҕа көһүннэ.
“Ырыа диэн бу айылҕа биир дьикти көстүүтэ. Ырыаттан норуот кимэ-туга, хайдаҕа көстөр. Ыллыыр омук инникилээх омук, ыллыыр омук эрэллэх омук, ыллыыр омук кэскиллээх омук. Онон биһиги ырыаны өрө тутуохтаахпыт”, – диэн бөлөһүөк К.Уткин эппитин биһиги, өйбүтүнэн-сүрэхпитинэн ылынан, Ырыа күнүгэр суолта биэрэн сыллата ыытан, көҕүлээн, ыччаттарбытын тардыах тустаахпыт.
У.Кондакова, п.н.к., педколледж мэтэдииһэ.
