Сайдам сахабыт тыла…

Олунньу 13  күнүгэр Н.Г.Чернышевскай аатынан  Бүлүүтээҕи  педагогическай колледжка саха тылын нэдиэлэтин арыйыы үөрүүлээх чааһа  өрө көтөҕүллүүлээхтик ааста. Бу тэрээһин сыал-соруга: өбүгэ төрүт үгэһин ыччат утумнууругар,  үтүө сиэргэ – майгыга уһуйуу буолар.Бастаан сахалыы сиэринэн алгыс тыла этилиннэ, оһуокай дуорайда, кытыан буруотунан ыраастаныы буолла. «Айылгы»норуодунай  коллектив толоруутугар «Алгыс ырыата»ылланна.

Бастакы  тыл үөрэхтээҕэ, саха саарына – Семен Андреевич Новгородов төрөөбүтэ 125 сылын туолар күнүгэр  аналлаах тьюторскай чаастар,  толкуй оонньуута «Тыл  баар – бараммат баай» буолла. Нэдиэлэ устата  С.А.Новгородов  олоҕор,  айар үлэтигэр  Учуутал мусуойугар аһаҕас уруок, «Тыл оонньуута»,  араатардар күрэхтэрэ, тотальнай диктант буолара бэлиэтэнэр. Олортон «Тыл оонньуута» устудьуоннар интэриэстэрин, болҕомтолорун тардар, биhирэммит сэргэх тэрээһини учууталлар учууталлара, үтүөҕэ-кэрэҕэ уһуйааччы  Кондакова У.Ф. иилээн-саҕалаан бэрт сэргэхтик ыытыаҕа.

Билиҥҥи сайдыылаах  олоххо ыччаты сиэр – майгы өттүнэн иитии, өбүгэбит үтүө үгэстэрин  тилиннэрии, төрөөбүт сахабыт тылыгар  улахан болҕомто ууруу  хайаан да наадалаах.

Анжелика Колтовская, Н.Г.Чернышевскай аатынан Бүлүүтээҕи педагогическай колледж алын кылаас учууталларын бэлэмниир салаа тьютора