Олунньу 7 күнүгэр Н.Г. Чернышевскай аатынан Бүлүүтээҕи профессионально-педагогическай колледж преподавателэ Васильев Григорий Егорович ыччаты эт-хаан өттүнэн иитиигэ, сайыннарыыга өр сыллаах үлэтин түмүктэрин сыаналааһын, ыччакка холобур буолар, үөрэх, иитии эйгэтигэр сыралаах үлэтин кэрчиктэрин сааһылаан бэлиэтээтибит.
Васильев Григорий Егорович, СӨ физкультураҕа уонна спортка үтүөлээх үлэһитэ, СӨ үөрэҕириитин туйгуна, СӨ физическай культураҕа уонна спортка үлэтин туйгуна,Учууталлар учууталлара, элбэх төгүллээх «Сыл бастыҥ тренерэ», саха уонна хотугу омук спордун көрүҥнэрин тренерэ, СӨ Президенин Гранын хаһаайына.
Григорий Егорович олоҕун анаарар көрүүтүн маннык бэлиэтиир: “Мин олохпун тэҥниибин, күүстээх сүүрүктээх үрэххэ, үрэх устан сундулуйар, ханнык эрэ кэмҥэ тохтоон ылардыы аргыый устар, онтон эмиэ күүһүрэн иннин хоту талаһар, эмискэ «харгыга» иҥнэн тохтоон, олох үөһүгэр тардыһан, мөхсөн, будулуйан ылар уонна «харгыны» тоҕо көтөн эмиэ иннин хоту устан сундулуйар, олоххо тардыһан өссө күүһүрэн иннин диэки дьулуһар, олох суолун батан киэҥ байҕалга тиийиэр диэри элбэх эрэйи, охсууну-түһүүнү, тахсыыны дабайан тиийиэхтээх сиригэр тиийэн, киэҥ олох эйгэтигэр киирэн оннун дьэ булар, сыалын-соругун ситэн, буһан-хатан, саха сахата буолан сандаарар, киһи килбиэнэ буолан килбэйэр…Олохпор оҥостубут «оҥочом», харгыга иҥнибэккэ, тиэрэ-түҥнэри барбакка киэҥ олох эйгэтигэр, билии аартыгар киллэрэн, суол — иис хаалларар «биэтэгэр» чугаһаан иһэриттэн киһи арыт хараастар, ол да буоллар олоххо хаалларбыт суолун-ииһин оҕолоро, сиэннэрэ, хос сиэннэрэ, үөрэппит-тахайбыт оҕолоро салгыахтара диэн эрэл кыымын үөскэтэн, олоххо талаһыы өссө күүһүрэр, эрэл кыыма саҕыллар…” – диэн.
Григорий Егорович биир таһаарыылаах үлэтэ – фольклорнай экспедиция. Мастаах түөлбэтин былыргы устуоруйатын үөрэтиигэ устудьуоннары холбоон, кыргыс үйэтинээҕи үһүйээҥҥэ олоҕуран, киинэ оҥорон, культурология үрдүк үөрэҕин дьупулуомун көмүскээбитэ. Артыыстара – устудьуоннар уонна Кыргыдай нэһилиэгин олохтоохторо. Григорий Егорович колледжка үлэлии сылдьан икки орто анал үөрэҕи (культурология, физкультура учууталын үөрэҕин), культурология үрдүк үөрэҕин ситиһиилээхтик бүтэрбитэ. Онон Григорий Егорович үлэһит бэрдэ буолан, элбэҕи ситистэ, элбэххэ үөрэннэ, аата-суола ааттанна, үрдүк чыпчааллары дабайда, колледжка физкультура уонна спорт сайдыытыгар улахан, умнуллубат кылаатын киллэрдэ. Талааннаах киһи барытыгар талааннаах диэн итини этэллэрэ буолуо. Ол да буоллар, Григорий Егорович олоҕун муҥутуур ситиһиитэ уонна анала – ыччаты спорт кэрэ эйгэтигэр уһуйуу эбит. Биир учуутал, тренер холугар сөп түбэспэт сүҥкэҥ үлэни үлэлээтэ. Бэйэтин суолун тобулан, ордук табыллан хотугу многоборьеҕа республикаҕа тарбахха баттанар профессионал-тренер буолла.
Улахан иллээх дьиэ кэргэн аҕа баһылыга, чөл олох көхтөөх туруулаһааччыта, Бүлүү сирин дьиҥнээх патриота, улахан учуутал, сатабыллаах тренер, сэмэй улэһит киһи Григорий Егоровичтыын ирэ-хоро кэпсэтэн, санаа атастаспыппыт эдэр коллегаларыгар, үүнэр кэнчээри ыччакка интэриэһинэй, улэҕэ-хамнаска, олоххо туһалаах буолуо диэн эрэниэҕи баҕарыллар.
Григорий Егорович: «Бары бииргэ, өйдөһөн-өйөнсөн олох суолун устун хаамсыҥ, айыҥ — тутуҥ, инники кэскилгитин оҥостуҥ!»
