Киһи аймах кэтит кэскилин чэчирин оҥкуллуур, сириэдитэр ийэ тылбыт саамал кымыстыы кыынньан, буспут дьэдьэннии минньийэн, мутукча сытынан дыргыйан дьоҕурбутун уһугуннарар, куппутун-сүрбүтүн бөҕөргөтөр, саргыбытын салайсар!
Олунньу 13 күнүгэр 1892 сыллаахха саха омук биир ча5ылхай уола, тыл үөрэхтээхтэриттэн бастакы учуонай, сахалыы суругу-бичиги төрүттээбит Семён Андреевич Новгородов төрөөбүтэ. Бу күн Өрөспүүбүлүкэ үрдүнэн ньиргиччи тэрээһиннэр ыытыллалар. Н.Г.Чернышевскай аатынан Бүлүүтээҕи профессиональнай-педагогическай колледж иһинэн араас таһымнаах тэрээһиннэр, күрэстэр буолаллар.
Саргылаах сахабыт тыла сандаарар Олунньу 13 күнүгэр устудьуоннар уонна уһуйааччылар кыттыылаах нэдиэлэ арыллыыта буолла. Тэрээһиҥҥэ “Айылгы” ырыа-үҥкүү народнай коллектива, “Саһарҕа” уһуйааччылар үҥкүүлэрэ, “Уолан” устудьуоннар түмсүүлэрэ, С.Г.Мытник салалталаах “Ситии” муода тыйаатырын кыра бөлөҕө кыттыылаах сэргэх арыйыы буолла. Төрөөбүт төрүт тылбытын харыстыаҕыҥ, сайдарын туһугар хас биирдии ыччат, уһуйааччы сүрүн кылааты киллэрэрин туһунан колледж дириэктэрэ Иван Иван Алексеев, ыҥырыылаах ыалдьыппыт СР култууратын үтүөлээх үлэһитэ, СР култууратын уонна үөрэҕириитин туйгуна, Гражданскай килбиэн бэлиэ хаһаайына, СР бочуоттаах бэтэрээнэ Марфа Спиридоновна Васильева бэрт дириҥ ис хоһоонноох этиилэрин сэргээн иһиттилэр. Маны таһынан колледж иһинэн уус-уран ааҕыы күрэҕэ, алын сүһүөх учууталларын бэлэмниир салаа устудьуоннара туруорбут “Лоокуут уонна Ньургуһун” испэктээх, “Айар аартык түһүлгэтэ”, “Тыл хонуута” күрэстэр. Маны таһынан остолобуойга сахалыы минньигэс ас-үөл, сахалыы шрифт туруоруута, бөлөхтөрүнэн кылаас чаастара ыытылыннылар.
Төрүт эйгэҕэ угуйуллан, сахалыы тыынынан салайтаран, төрөөбүт тылбытын сайыннарар тэрээһиҥҥэ бары көхтөөхтүк кыттан куппутун бөҕөргөтөбүт, иҥэринэбит!
