Олунньу ый 21 күнүгэр Тааһаҕар нэһилиэгэр Игнатий Иванович Каратаев төрөөбүтэ 100 сылыгар аналлаах республиканскай научнай-практическай конференция буолан ааста.
Н.Г. Чернышевскай аатынанан Бүлүүтэҕи профессиональнай педагогическай колледж делегацията кыттыыны ылла: Васильева Н.В., Саввинова М.А., Басова Е.В., Варламова С.М.
Бочуоттаах ыалдьытынан Ил Түмэн наукаҕа, үөрэххэ, култуураҕа, иһитиннэрэр-биллэрэр сириэстибэлэргэ уонна түмэт тэрилтэлэр дьыалаларыгар сис кэмитиэтин бэрэссэдээтэлэ, Ил Түмэн дьокутаата Феодосия Васильевна Габышева буолла.Эксперт быһыытынан кэлэн үлэлээтилэр:-Саха литэрэтиирэтин орто оскуолаҕа үөрэтиигэ мэтэдиис-учуонай, педагогика билимин дуоктара, бэрэпиэссэр Поликарпова Евдокия Михайловна;
— Саха Өрөспүүбүлүкэтин билимин академиятын төрүт омуктар тылларын киинин сүрүннүүр үлэһитэ Семенова Светлана Степановна;
— РФ төрүт омуктарын тылларын федеральнай үнүстүтүүтүн Дьокуускайдааҕы салаатын дириэктэрин эбээһинэһин толорооччу, педагогика билимин хандьыдаата Васильева Надежда Николаевна.
НПК-ҕа уопсайа 200 кэриҥэ ыалдьыт кыттыыны ылла, 188 араас үлэ киирдэ.
Ыраах Кыргыдай нэһилиэгиттэн РСФСР үөрэҕириитин туйгуна, «Учууталлар учууталлара» бэлиэ хаһаайына, педагогическай үлэ бэтэрээнэ, Бүлүү улууһун, Кыргыдай нэһилиэгин бочуоттаах олохтооҕо Николаева Евдокия Гаврильевна кэлэн барда. Кини Игнатий Ивановичтыын бииргэ алтыспыт, киниэхэ үөрэммит аҕам саастаах киһибит.
Кэмпириэнсийэ чэрчитинэн резолюция ылынылларыгар төгүрүк остуол ыытылынна, Игнатий Иванович аатын үйэтитиигэ араас таһымнаах этиилэр киирдилэр.
Үөрүүлээх күнү түмүктүүр чаас «Эйгэ» норуот айымньытын дьиэтигэр үрдүк таһымнаахтык буолан ааста.
Игнатий Иванович чугас аймаҕа Таися Егоровна Кулакина «Саллаат. Учуутал. Учуонай» кинигэни хомуйан таһааран киэҥ эйгэҕэ сүрэхтээтэ.
Түмүккэ НПК кыайыылаахтарын бэлиэтээтилэр, Дьокуускай куораттан кэлбит кэмпириэнсийэ экспертэрэ тэрийээччилэргэ махтанан эҕэрдэ суруктуттардылар, маннык тэрээһиннэр салгыы ситимин быспакка ыытылла туралларыгар баҕардылар.
Бүгүҥҥү күҥҥэ мустубут ыраахтан-чугастан кэлбит кэмпириэнсийэ кыттыылаахтара, ыалдьыттар астынан-дуоһуйан тарҕастылар.
