Арассыыйа норуоттарын култуураларын нэһилиэстибэлэрин сыла түмүктэнэр чэрчитинэн ахсынньы 16 күнүгэр колледжка “Учууутал сатаабатаҕа суох» диэн улуус таһымнаах быыстапка-практикум буолан ааста. Быыстапка аата этэринии иитэр-үөрэтэр сыала-соруга ураты, бастатан туран устудьуоннарга, эдэр учууталларга аналлаах буолла итиэннэ быыстапка ис хоһоонунан элбэх дьоҕурдаах, үгүс сатабыллаах учуутал сатабыллаах үөрэнээчилэри иитэр, бэйэтэ баһылаабыт дьарыктарын үөрүйэхтэригэр оҕолору угуйар, кинилэри батыһыннарар буоллаҕына, үлэтэ-хамнаһа балачча таһаарыылаах буолара чахчы диэн өйдөбүлү саҕар.
Быыстапка ааптара Россия худуоһунньуктарын Сойууһун чилиэнэ, “Ситии” муода студия салайааччыта Светлана Мытник буолар. Бу иннинэ Светлана Григорьевна анал быыстапкалара Е.Ярославскай аатынан музейга уонна Өксөкүүлээх Өлөксөй аатынан Норуоттар доҕордоһууларын дьиэтигэр “Симэх” галереяҕа турбуттара.
Алексеев И.И., колледж дириэктэрэ быыстапка арыллыытыгар маннык диэн бэлиэтээтэ: “Быыстапка олус бэркэ толкуйдаммыт. Светлана Григорьевна хайа баҕаран ыытар тэрээһиннэрин эдэр ыччаты иитэр-үөрэтэр дириҥ суолталыыр, иккиһинэн, саҥа бырайыактарын саҕалыырыгар атыттары көҕүлээн, тус холобур буолардыы бэйэтэ тэрийэр, ыытар, көрдөрөр”.
Харлампьев Н.Н., куорат мунньаҕын бэрэссэдээтэлэ бэйэтин эҕэрдэтигэр этиннэ: “ Учууталбыт Светлана Григорьевна тугу гыммыта барыта сонун ис хоһоонноох, хамсаныыта далааһыннаах, ыытара үрдүк таһымнаах, мин ону уруккуттан бэлиэтиибин, астынабын, киэн туттабын. Кини куруук эрчимнээх эдэр уһуйааччы, бириэмэттэн, кэмтэн харыс да хаалсыбакка куруук олоҕу кыттта тэҥҥэ хардыылаһар, үксүгэр инники сылдьар, ол иһин кинини кытары алтыһар олус интэриэһинэй. Бу да сырыыга Россияҕа биллэриллибит култуура нэһилиэстибэтин сылын түмүктэһэр баай быыстапката салгыы өссө киэҥ эйгэҕэ тахсыа диэн баҕа санаабын тириэрдэбин, ону Светлана Григорьевна кыайа тутуоҕа.”
Назарова В.М. преподаватель, салаа салайааччыта: “Бары өттүнэн эргиччи дьоҕурдаах учуутал, уһуйааччы, сатабыллаах салайааччы, муҥурун булларбат идиэйэлэрдээх, уһулуччулаах бырайыактарынан колледж үлэтин киэҥник сураҕырпыт уонна саҥалыы тыыннаабыт биир идэлээхпит өссө биир киһини соһутар талаанын таһаарда. Харахпытынан илэ көрөн, илиибитинэн тутан- хабан көрбөтөхпүт буоллар, киһи итэҕэйиэ суоҕун курдук, саҥата-иҥэтэ суох сылдьан, күүстээх үлэ быыһыгар быыс булан оҥорбута элбэҕин, өлгөмүн, бу оҥоһуктара хатыламматтарын, суохтан баары, быычыкайкаантан улаханы оҥорорун хайдах сөҕүө суохха сөбүй, холобур эрэ оҥостуохха сөп. Мин биир идэм иистэнньэҥ, онон бу иис үлэтин иһин-таһын, ымпыгын-чымпыгын, улахан үлэни, тулууру, сыраны эрэйэрин бэркэ билэбин. Дьэ ону сатаабыт. Кини туппута- уурбута барыта үтүө түмүктэрдээх, кыттыспыкка барыларыгар туһалаах, ситиһии көтөллөөх буолар. Киниэхэ дьон, ыччат тардыһар. Оҕолор Индияттан саҕалаан, Калмыкияҕа, Тываҕа, Чувашияҕа, Татарстаҥҥа, Россия киин куораттарынан педэкспедицияларга сылдьыһан төрүт омуктарын киэргэллэрин, симэхтэрин толору кэтэн үрдүк подиумнарга тиксэн, Гран При, Лауреат буолан, тутум үрдээн, төгүрүччү тупсан, сайдан кэлиилэрэ барыбытыгар олус күндү. Светлана Григорьевнаҕа бу үөрүүлээх күн этиэҕи баҕарыллар, үйэлээҕи киллэрбит кылаатыҥ эйигин кытта алтыспыт элбэх ахсааннаах ыччаккар, коллегаларгар сырдыкка сирдиир сылаас сүүрээн буолар аналлааҕын саарбахтаабаппын. Быыстапкаҕа сылдьан астына дуоһуйдум”.
Максимова М.А., преподаватель, заведующая отделением: “Много девушек из нашего отделения успешно занимаясь в студии моды “Ситии”, стали лауреатами, победителями многих международных, республиканских, региональных конкурсов, за это всегда благодарны Светлане Григорьевне. Студентки наши, наряжаясь в свои национальные эвенкийские, эвенские, долганские костюмы с прекрасными украшениями, приветствуя на родном языке делали настоящий фурор в различных мероприятиях по программе педэкспедиции “Педагог будущего”, мы этим всегда гордимся. Посетив выставку захотелось и самим пройтись по подиуму. А как красивы торбоза — ботфорты из оленьих шкур, ровдуги, из конских волос — это уникальные изделия, сотворенные Светланой Григорьевной. Отрадно то, что она учит своему ремеслу студентов, пусть потихоньку, но настанет время девчата вспомнят первые навыки шитья от Светланы Григорьевны, в жизни все пригодится”.
Прокопьева М.Н. преподаватель, салаа салайааччыта:” 5-6 сыллааҕыта Светлана Григорьевна бэйэтэ билинэринэн иистэммэтэ эбитэ үһү. Дьэ кырдьык, “Баардаах баара батарбат» диэн маны этээрдэхтэрэ, син- биир талаан баарын биллэрэр эбит. Билигин Григорьевна персональнай быыстапка тэрийиэр дылы, бэйэтэ этэринэн геннарын лаппа уһугуннарбыт, туспа суоллаах-иистээх, киһи сэргиир, сыаналыыр үлэлэрдээх иистэнньэҥ. Мин кини ийэтин билэрим, Анна Ивановна тарбахха баттанар көмүс сүүтүктээх бүтүн дэриэбинэни таҥыннарар иистэнньэҥ бастыҥа этэ. Григорьевна сатаан бириэмэни аттарарын сөҕөбүн, холобура, биһиги кабинеппыгар чаастатык тохтоон, кэпсэтэн, чээй иһэр үгэстээх. Ол олорон ииһин тута сылдьар буолар, тугу да сыыска-буорга түһэрбэт, ол да иһин үлэлэрин уустугурдубакка, уһуннук соспокко бүтэрэн-оһорон иһээрдэҕэ. Ардыгар биһиги эдьиийбитин “туппутун ыыппат, тыыппытын ыһыктыбат, таарыйбытын таммалаппат” диэн оонньуу-күлэ ойуулуурбутун күлэр уонна сөбүлэһэр.»
Нифонова И.В., зам. директора ДК “Алгыс”: ”Быыстапка көстүүтэ кыраһыабайын, киһи көрөөт саҥа аллайа түһэр. Оҕуруоттан оҥоһуктарын ойуулуурга тыл тиийбэт. Сиэлтэн, кылтан оҥоһуктар кэрэ да баҕайытык кэккэлэспиттэр. Били эппиккэ дылы, буор босхо матырыйаалтан, сиргэ сытар сиэлтэн, күрүөҕэ ыйанан турар кутуруктан, сарай үрдүгэр сыппыт, хаппыт-куурбут таба муоһун эрбээн-үүттээн, хаатыҥкаҕа аалан-килэбэчитэн, сарыынан, оҕуруонан эбэн-сабан бэртээхэй уонна хатыламмат оҥоһуктары айан-тутан кэбиһиэххэ сөп эбит. Тоҕо мин манныгы толкуйдаабатым буолуой диэн сонньуйа санаан ылар эбиккин уонна киһи сатыырын киһи сатыахтаах диэн кырдьыкка ыллараҕын. Боруобалаан көрөр баҕа үөскүүр эбит. Сиэлтэн, сылгы кутуругуттан оҕуруолаан — дьэрэкээннээн тигиллибит уһун остоох куруму этэрбэстэр, аны туран сиэлтэн киһи ханна баҕаран кэтиэх курдук кулгаахтаах бэргэһэ, мин манныктары ханна да көрө иликпин, дьон фантазиялаах да буолар эбит.»
Алексеев Е.Р. преподаватель: “Мин бу быыстапка турарын тухары 7-8 төгүл төхтүрүйэн киирэ-киирэ көрөн астынным, ол тухары сөҕөрүм үксээн истэ. Сүрүн үлэтиттэн бу хаһан бокуойданан баччалаах ииһи сабыта тутан, бүтэрэн-оһорон дьон дьүүлүгэр, сыаналааһыныгыр таһаарара төбөбөр баппата. Инники өссө тугу айан таһаарарын киһи кыайан сэрэйбэт. Аны дьүкээбил уотунан оонньуур, кустук сэттэ өҥүнэн күлүмүрдүүр “Ситим” муода студиятын кыргыттара Россия араас куораттарынан, аан дойду таһымнаах куонкурустарга хотон, муҥутуур аакка-суолга тиксэн кэлэллэр. Григорьевна ону барытын киинэҕэ устан, хаартыскаҕа түһэрэн республика араадьыйатыгар, телевиденияҕа, хаһыаттарга таһаарар. Колледжка отчуоттуурун күүтээччи, сэҥээрээччи, бииргэ сылдьыспыт курдук сананааччы өрүү элбэх буолар. Салгыы бу курдук туругуҥ тупса турдун, айымньылаах үлэлэриҥ үксээтиннэр, айар үлэҥ аартыга арыллан иһиэхтин, оҕолоргун, ыччаккын кэрэҕэ угуйар талааҥҥынан сүгүрүйээччилэргин сөхтөрө, соһута, үөрдэ сырыт”.
Петрова Люба, устудьуон:” Мин наһаа сөбүлээтим бу быыстапканы, учууталларбыт наһаа талааннаахтар эбит. Маастар-кылаастарга үөрэннибит. Инникитин маннык тэрээһиннэр буола тураллара буоллар туһалаах баҕайы буолуо эбит. Быыстапканы көрө-көрө, биһиги да сатыахпытын сөп эбит диэн ымсыырдыбыт, баҕардыбыт. Элбэҕи ылынныбыт, талааннарбытын сайыннара сатыырбыт наада, үөрэхпитин бүтэрэн, оскуолаҕа тиийэн айымньылаахтык үлэлиирбитигэр көмө буолуоҕа. Мин эдьиийим Голомарева Регина Светлана Григорьевнаны кытары Тываҕа педэкспедицияҕа барса сылдьыбытын куруук ахтар, кэпсиир, миигин эмиэ барыы буоллаҕына эбэһээт барсаар диэ сүбэлиир».
Софронеева М.А., преподаватель: ”Светлана Григорьевнаҕа Үөһээҥҥи Айыылар илиитигэр дьоҕуру добуоччу ирээттээбиттэр диэххэ сөп. Ол бэлэҕи киһи бэйэтэ дьаныһан туран сайыннарара наада, инньэ гыммат буоллахха уостара чуолкай, онно дьаныар, сүрэх-бэлэс ирдэнэр. Студиятын коллекциялара ааттара да эриэккэс “С работы на party”, “Экостиль- фантазии полет” иҥин диэн. Ыһыаҕын таҥаһын бэйэтэ тиктибит, олоро куйааска, сөрүүҥҥэ, ойуурга кэтэр диэн тус-туспа аналлаахтар, киэргэллэрин өҥнөрө олус табаллыбыттар. Иис эрэ буолуо дуо Светлана Григорьевна дьарыктара, кини ыстаастаах автоледи, кыраҕы харахтаах фотограф, 30 сылы быһа илиитигэр камера тутуурдаах видеооператор, Японияттан, Монголияттан, Кытайтан, Калмыкияттан, Тываттан, Чувашияттан о.д.а устан аҕалбыт үлэлэрэ республикаҕа көстөллөр. Манна эбии прораб, тутуунан эмиэ дьарыгырар, орто баайыылаах киһи сиппэт оҕуруотчута, Томскайга, Ленинградка 15 союзнай республикалар суоллаах- иистээх аатырбыт артыыстарын кытары тэҥҥэ киирсэн лауреат буолбут конферансье, маны таһынан Россия суруналыыстарын, худуоһунньуктарын Сойуустарын чилиэнэ, 10-тан тахса кинигэ ааптара, аҥардас былырыын 3 кинигэни сүрэхтээбитэ. Биир киһи холугар баппат диэхпин баҕарабын. ”
Быыстапкаҕа барыта биирдиилээн аахтахха 100-чэкэ араас оҥоһук 3 хайысханан “Хотугу суһум”, “Сиэл симэх, кыл киэргэл”, “Ыһыах талба таҥаһа” диэн наардаммыт. Сылдьыбыттар ааптар элбэх үбү-харчыны эрэйбэт матырыйааллартан үлэлиирин бэлиэтээтилэр, үрдүктүк сыаналаатылар. Эгэлгэ оҕуруо, сарыы, кыбытык аттарыы, ситии, тимир олус табатык дьүөрэлиспиттэрэ көрүөххэ кэрэ. Бу күн колледж уран тарбахтаахтара Докторова Л.В., Тутукарова А.Н., Васильева Н.В. маастар-кылаастары ыыттылар, быыстапка — практикум силигин ситэрдилэр. Элбэх киһи киэргэллэри манекеннартан устан үйэлээх хаартыскаҕа түһэн үөрдүлэр — көттүлэр, ол барыта көҥүллэннэ бу күн. Быыстапканы тэрийиигэ “Эрчим” уопсай дьиэ Ноговицына Анжелика салайааччылаах бэйэни салайыныы түмсүүтэ, лидердар Лукинова Дайаана, Макарова Наталья, Винокурова Раиса, Кириллина Дайаана, Сергеева Валерия, Анисимова Дайаана үөрэ-көтө көмөлөстүлэр, оҕолорго истиҥ махтал.
