Сандал саас, сайыҥҥы куйаас, көмүс күһүн төһө да үчүгэйэ элбэҕин үрдүнэн саха киһитэ кыһын барахсан томороон тымныыларын, чысхаанын, силлиэтин — буурҕатын син биир суохтуур, кэтэһэр. Кыһыны көрсүү кыстыкка бэлэмнэнииттэн саҕаланар. Олортон биир улахан тэрээһин-элбэх дьону хамсатар далааһыннаах, бэйэтэ туһунан романтика — муус ылыыта буолар. Н.Г.Чернышевскай аатынан Бүлүүтээҕи колледжка сылын ахсын амарах сүрэх Муус party ааксыйата ыытыллар. Үлэ ветераннарыгар учууталлар “Түмэн” түмсүүлэрэ муус ылан, киллэрэн, сааһылаан кэбиһэллэрэ үгэскэ кубулуйда. Ветераннар үөрүүлэрэ үрдүк, уолаттарыгар махталларын бэлиэтин “Идэһэ- 2022” остуолун тэрийэн күндүлээтилэр.
Николай Иванович салалталаах “Түмэннэргэ”, уолаттарбыт биригээдэлэригэр баһыыба бастыҥын ыытабын. Киэһэ хойут айантан кэлбитим лаабыспар муус сааһыланан кэчигирээн кылабачыйан ахан турар эбит, ону көрөн эчи үөрдэхпиэн. Сатаан бардахха олбуорбар киирии сир барыта
моһуоктааҕын ааһан, барыта харгыстаах, сэттэ уон ордуга сэттэ боруота арыллыахтаах, итиннэ шахта манна дьаама диэбит курдук, аны ол онтон кыбытык сиринэн ааһыаххын наада, быһата, лаппа кыахтаах эрэ киһи моһоллору туораан дьыалатын ситиһиэх балаһыанньата. Ону ол диэбэккэ суол булан, ол кыараҕаска тугу да тоҕо көппөккө киирэн муустарын чөкө сааһылаан кэбиспиттэр. Уолаттарга махталым муҥура суох, кыһыны быһа муус киллэрэн, чэй иһэ-иһэ сүүстэ махтаныам турдаҕа.
Римма Нестерова
Арай дьиэм аанын чөкө баҕайытык тоҥсуйаллар, сүүрдэн тиийэн арыйа баттаабытым 2 эдэркээн баҕайы уолаттар тураллар эбит, муус аҕалбыттар, ханна сүөкүүллэрин ыйыталаһаллар, барахсаттар балачча кырыарбыттар, кыһын тымныытын биллэрээрдэҕэ дии. Массыыналарын киллэрэ охсон, муустарын туппутунан быыстала суох сүүрэ сылдьаллар, сүр түргэнник бүтэ оҕустулар. Бачча үчүгэй үлэни хаартыскалыы охсоору телефон көрдөнүү, аны туран дьоллоох түгэни киэргэтээри мааны сапожканы кэтии бэһиэлэй түбүгэ буолла, ол тухары дьиэнэн күлүү-үөрүү, сүүрүү- көтүү, үчүгэйэ бөҕө. Уолаттарбытыгар күн сирин үчүгэйин мунньан алгыспын ыытабын, үтүө санааҕыт эһигини өрүү арчылыы сырыттын. Дом!
Варвара Народова
Маннык мааны майгылаах үөрэппит-иитиспит ыччаттардаах дьоллоох уһуйааччы эбиппин диэн аһара үөрдүм. Ветераннар барахсаттар үйэлэригэр барыны барытын кыайан-хотон үлэлээн кэллэхтэрэ, саас баттаан кыра да кыаллыбат буолар кэмэ кэлэр. “Оптимист” кулууппут салайааччыта Евгений Романович сылын ахсын тыл көтөҕөн, коллективпыт аҕа баһылыга Иван Иванович массыына, бензин биэрэн муус ылыытын тэрийэллэрэ сүҥкэн суолталаах. Маннык тэрээһин коллективы түмэр, ыччаты аҕа көлүөнэни ытыктыырга иитэр, туһалаах дьарыктаах буолууга көҕүлүүр.
Ксения Семенова
Биһиэхэ, остолобуой үлэһиттэрин умнубакка муус киллэрэн улахан үөрүүнү бэлэхтээтилэр. Кыстыыр мууспутун кыстаан, сааһылаан биэрдилэр, биһиги маннык ааксыйаҕа аан бастакыбытын тигистибит. Наһаа да үчүгэй эбит, үлэлиир тэрилтэ көмөтө диэн. Дириэктэрбитигэр Иван Ивановичка, учуутал уолаттарга, сэбиэдиссэйбитигэр Айаал Эрээловичка наһаа улахан махтал, бары этэҥҥэ буолуохха.
Людмила Матвеева, Тамара Афанасьева
Улахан махталбытын биллэрэбит биһиги убаастыыр киэн туттар киһибитигэр Мытник Светлана Григорьвнаҕа. Кини кыттыһар буолан үлэбит таһаарыылаах, түмсүүлээх. Бэйэҕит да билэргит буолуо, кини дьону хайдах хамсатарын. Оонньуу-күлэ эттэххэ, булан баран арахпат, этэн баран бүппэт, тутан баран ыһыктыбат, тыытан баран ыыппат, тугу ылсыбытын тиһэҕэр тириэрдэр дьүккүөрдээх салайааччы. Кини биһиэхэ улахан сүбэһиппит, киниттэн үөрэнэрбит элбэх.
Николай Николаев, “Түмэн” түмсүү салайааччыта
