Саха сиригэр үөрэҕирии сайдарыгар сүҥкэн кылаатын киллэрбит Николай Чернышевскай аатынан Бүлүүтээҕи педагогическай колледж төрүттэммитэ быйыл 100 сыла буолар.

Бу педколледжы (училищены) араас сылларга бүтэрбит Өлөөн выпускниктара үөрэммит кыhабыт үбүлүөйүн көрсөргө бэлэмнэнэн, батсаапка анал бөлөх тэриммиппит. Бөлөххө уопсайа 70-тан тахса киhи баар. Ол курдук, үтүөлээх дьоммут, ветеран учууталларбыт Николаева Татьяна Егоровна (выпуск-1968), Кучарова Лариса Ивановна (выпуск-1968), Николаева Валентина Иннокентьевна (выпуск-1969), Дмитриева Вера Семеновна (выпуск-1970), Христофорова Варвара Васильевна (выпуск-1974), Кириллова Клара Васильевна (выпуск-1974). Маны таhынан бааллар өрөспүүбүлүкэ араас улуустарыгар тарҕанан олорор биhиги выпускниктарбыт: Семенова Надежда Христофоровна (выпуск-1989) Орто Халымаҕа Эбээх орто оскуолатыгар алын кылаас учууталынан үлэлиир, Григорьева (Павлова) Степанида Николаевна — Синильга (выпуск-2001) Дьокуускайга Аҕыйах ахсааннаах хотугу норуоттар театрдарыгар үлэлиир, Томская Мотрена Ильична (выпуск-2001) Хаҥалас улууhун Нөмүгүтүгэр уhуйаан иитээччитэ, Афанасьев Христофор Юрьевич (выпуск-2010) Уус-Алдан улууhун Суоттутугар физкультура учуутала, Алексеева Ангелина Альбертовна (выпуск-2020) Сунтаарга Хадан орто оскуолатыгар алын кылаас учуутала, Спиридонова Дарианна Николаевна (выпуск-2021) СВФУ устудьуона. Бөлөхпүтүгэр бааллар колледж устудьуоннара – быйылгы выпускниктар Тимофеева Анжелика, Семенова Айыллаана, Семенова Айсена.

Үбүлүөйгэ бэлэмнэнэн араас саҥа бырайыактар олоххо киирдилэр. Биhиги бөлөх биир оннук улахан бырайыакка «Учуутал Аллеята» диэҥҥэ кыттан арт-объект оҥорторбуппут. Ол арт-объекпыт – ураhа.

Иккис улахан бырайыагынан «Көмүс Чуораан» педагогическай челлендж буолар. Кыhыл көмүс чуораан өрөспүүбүлүкэ бары нэhилиэктэринэн, куораттарынан айанныыр. Өлөөн эбэҥки национальнай оройуонугар чуораан ааспыт сыл ахсынньы 28 күнүгэр Харыйалаах оскуола-саадыгар кэлбитэ. Түгэнинэн туhанан, биhиги көрдөhүүбүтүн ылынан, Ем.Ярославскай аатынан кыраайы үөрэтэр түмэлгэ педчеллендж «Көмүс Чуораанын» туттарыы үөрүүлээх түгэнигэр сылдьан, чуорааммытын аҕалбыт Альгис Сергеевка махталбытын тиэрдэбит. Маны таhынан колледж устудьуоннара бэлэмнээбит бэлэх-баhыылкаларын оҕону уонна дьиэ кэргэни өйүүр кииҥҥэ аҕалбыта.

Харыйалаах оскуола-саадыгар Бүлүүтээҕи педучилище 9 выпускнига үлэлиир. Тапталлаах училищебыт 100 сыллаах үбүлүөйүн көрсө биhиги араас тэрээhиннэри ыыттыбыт.

Салгыы «Көмүс Чуораан» тохсунньу 22 күнүгэр Өлөөн орто оскуолатыгар бэриллибитэ. Манна эмиэ араас тэрээhиннэр ыытылыннылар. Ол кэннэ чуорааммыт Өлөөн нэhилиэгин уhуйааннарынан сырытта.

Ити курдук, «Көмүс Чуораан» педчеллендж бу күннэргэ Дьэлиҥдэҕэ айанныа, онтон Ээйик нэhилиэгэр тиийиэҕэ.  Көмүс чуорааммыт илииттэн илиигэ тиксэн, оскуола, оҕо уhуйаанын аайы Бүлүү педколледжын (училищетын) араас сылларга бүтэрбит оҕо иитиитигэр олохторун анаабыт уонна билигин ситиhиилээхтик үлэлии сылдьар учууталларга, уhуйаан иитээччилэригэр өйдөрүттэн сүппэт, дууhаларыгар «Кырылас кумахтаах Бүлүүбүт биэрэгэр эдэр сааспыт сыллара көтөн-устан ааспыттарын…» санатар күндү дорҕоонноох чуораан тыаhын аныаҕа уонна үбүлүөйү көрсө колледжка эргийэн тиийиэҕэ.
Тапталлаах училищебыт өрөгөйдөөх 100 сыллаах үбүлүөйгүнэн! Үөрэппит, үгүс билиини биэрбит учууталларбар сүгүрүйэбин, махтанабын.
Бүлүү педучилищетын бүтэрбит биир идэлээхтэрбэр эҕэрдэ бастыҥын ыытабын! Үлэҕитигэр үрдүк ситиhиилэри! Доруобуйаны!
 
Васильева Галина Николаевна,
Харыйалаах орто оскуолатын алын кылааhын учуутала,
Бүлүү педучилищетын 1985 с. выпускнига.

×

Hello!

Click one of our contacts below to chat on WhatsApp

× Центр социально-психологической поддержки.