Ил Дархаммыт Айсен Сергеевич Николаев норуокка туһаайыытыгар кэлиэхтээх саҥа 2022 сылы Ийэ сылынан биллэрбитин бары үөрэ-көтө өрө көтөҕүллэн иһиттибит, олус сэргээтибит. Салаабыт сэбиэдиссэйэ Прокопьева Мария Николаевналыын сүбэлэһэ түһэн баран, бу сылы “Ийэ сыла- үтүө дьыала сыла” диэн колледжка ааксыйа биллэрдибит. Ааксыйабыт бастакы хардыытынан буолла — уһук хоту улуустарга үлэлиир оҕоҕо уонна дьиэ кэргэҥҥэ көмөлөһөр Кииннэргэ саҥа дьыллааҕы бэлэх- баһыылка хомуйуута. Ааксыйабытын бастакынан Республика үөрэҕириитин үтүөлээх үлэһитэ Назарова Валентина Максимовна сэбиэдиссэйдээх алын сүһүөх кылаастар учууталларын бэлэмниир уонна Максимова Марина Алексеевна салайааччылаах детсад иитээччилэрин уһуйар салаалар өйөөбүттэрэ. Кинилэр Өлөөн уонна Дьааҥы улуустарыгар ыыппыттара.
Ис санааларыттан баҕаран туран, 312 группа эбии баһыылка оҥорон Өлөөн оҕолоругар анаабыттара, куратордара Калачикова Туяра Спиридоновна. Биһиги салаа икки дьааһыгы хомуйа охсон, Эдьигээн улууһугар ыыттыбыт. Баһыылкаларбытын Дьокуускайга учууталларбыт илдьибиттэрэ. Бэлэхтэрбитин ахсынньы 22 күнүгэр Е.Ярославскай аатынан музей сотруднига Максимова Октябрина Петровна үүннээн-тэһииннээн ыыппыт тэрээһинигэр Өлөөнтөн Сугулаан бэрэссэдээтэлэ Сергеев Альгис Семенович, Эдьигээнтэн Баахынай оскуолатын дириэктэрэ Шишигин Айсен Егорович, Верхонскайтан Слепцова Елена Афанасьевна кэлэннэр үөрүүлээх быһыыга-майгыга туттулар. Баһыылкабытын ыытаары Эдьигээҥҥэ эрийэн билсэн кэпсэппиппит, Киини салайан үлэлэтэр дириэктэринэн колледжпыт выпускницата Алексеева Жигалена Васильевна диэн эбит. Биһиги ааксыйабытын истэн соһуйбута уонна олус махтаммыта. Кини Бүлүүгэ үөрэммит, коллеһы 2001 сыллаахха бүтэрбит, кураторыгар Мытник Светлана Григорьевнаҕа наһаа махтанарын кэпсии охсубута. Үөрэппит учууталларын барыларын ааҕа ааттаабыта: Кондакова У.Ф., Алексеев Е.Р., Егорова Н.И., Новгородова А.А., Васильева В.А.. Васильева М.С., Васильева Е.С., Кондаков А.В., Васильева Г.И., Васильев Г.Е. Бу курдук Саҥа сылы, Ийэ сылын үтүө дьыаланан саҕалаабыппытыттан аһара астынныбыт.
Бэйэни салайыныы лидера Наталья Тимофеева
