Балаҕан ыйын 17 күнүгэр колледжка «Күһүҥҥү ыһыах» диэн сонун тэрээһин буолан ааста. Ыһыах сүрүн соруга — өрө күүрүүлээхтик уонна үөрүүлээхтик үөрэх сылын саҕалааһын,  үөрэнэ кэлбит ыччаты көхтөөх устудьуон олоҕор кытыннарыы, бэйэ- бэйэлэрин  кытта чугастык алтыһыыларын тэрийии, талааннаахтары таба тайаныы, үлэһиттэр түмсүүлээх буолууларыгар усулуобуйалары олохтооһун.

     Ыһыах бырагыраамматын чэрчитинэн  бастакынан Ытык Сэргэни туруоруу буолла. Ытык Сэргэни колледж 100 сылыгар   бэлэх уунна биир дойдулаахпыт, “Киэргэ” ювелирнай фирма директора Павлов Александр Кириллович.  Кини Сэргэтин оһуорун-мандарын  түһэриитигэр аныыр  сиэригэр-туомугар маннык диэн эппитэ: “ Бүлүү  кырдьаҕас үөрэҕин кыһата улууспутун суон сураҕырдар, киэҥ эйгэҕэ ааттатар, үөрэҕирии, култуура, духуобунас Киинэ буолар  киэн туттуубут. Биһиги дьиэ кэргэн Бүлүү училищетын, коллеһын кытта ыкса сибээстээхпит. Педучилищены 1946  сыллаахха аҕам Павлов К.Е. бүтэрбитэ. Кини бу үөрэҕин кыһатын кытта өрүү сибээстээх, олус истиҥник ахтар уонна махтанар, училищетын үлэтин-хамнаһын куруук интэриэһиргээн истэр, сурукка-бичиккэ тиһэр.  Бу колледжка өр сылларга английскай тыл учууталынан уонна методиһынан айымньылаахтык үлэлээбитэ эдьиийим Никифорова Л.К. Улууска Баһылыктыыр кэмигэр балтым Павлова А.К. саҥа үөрэнэр корпус тутуутун турууласпыта, олоххо киирэригэр сыратын биэрбитин билэбин.  Колледж өрөгөйдөөх үбүлүөйүгэр түбэһиннэрэн,  Аан дойдуга тарҕатар бырайыагым чэрчитинэн Ытык Сэргэни аныыбын. Үүнэр көлүөнэ Ытык Сэргэҕэ сүгүрүйэн күүс-уох эбиннин, чөл өй-санаа олохсуттун,  чэгиэн — чэбдик турукка тардыстын”. Үөрүүлээх күнүнэн бар дьону истиҥник эҕэрдэлээтилэр  колледж дириэктэрин э. т. Алексеев И.И. уонна  алын сүһүөх оскуола учууталларын бэлэмниир салаа салайааччыта Назарова В.М.

     Ытык Сэргэ Учуутал Аллеятыгар  миэстэтэ ыйыллыбыта. Эдэркээн бэйэлээх арыалдьыт-кынат  кыргыттарын, уолаттарын батыһыннаран,  уот оттон, сыт таһааран, айыыларга анаан кымыс ыһан күдээритэн, тойук туойан дьэрэлитэн  Сэргэ турар сиэрин-туомун толордо алгысчыт, түсчүт саха төрүт үҥкүүтүн   үтүөлээх этээччитэ Мэҥкэр Сэмэн  Хабырыыл уола. Ол кэннэ кэлбит ыалдьыт барыта өрө көтөҕүллэн туран, айылҕаттан күүс-уох киллэринэ, айымньылаах үлэҕэ кынаттана, тус олоҕор табыллыыны  тускулана Сэргэ тула тоҕуоруһан Алгыс оһуокайыгар кыттыста. Ытык Сэргэ турар  малааһыныгар — саламааттан саҕалаан, алаадьы арааһыгар, күөрчэххэ тиийэ үрүҥ ас эгэлгэтигэр кэлбит барыта тигистэ.

   Дьэ,  онтон эдэр ыччаты көҕүлээн,  төрүт үҥкүүгэ интэриэһин тардан,  үгүс үтүмэн үйэлэртэн бүөбэйдээн илдьэ сылдьар төрүт үҥкүүбүт алгыстаах  тылларын  сөргүтэн,  бэйэ духуобунай күүһүн бөҕөргөтүнэр  “Күһүҥҥү оһуокай”   күрэҕэ биллэрилиннэ, 20-чэ   устудьуон суруттарбыт.  Көмүс күһүнү уруйдуу  оҕолор Эллэй эһэбит саҕаттан этиллибит эһиэкэйдэрин  эҥээриттэн ыллылар, Омоҕой баайбыт саҕаттан олохтоммут оһуокайдарын оройуттан туттулар, илии-илииттэн сиэттиһэн, тоҥолохтон тутуһан элээннии эҥээрдэстилэр, дьоһун түһүлгэ тэрийдилэр, дуоһуйа ыллаатылар-туойдулар.  Томскай В.В., Варламова С.М. салайааччылардаах «Айылгы” норуодунай кэлэктиип араас улуус, түөлбэ оһуокайдарын толоруута силиги ситэрэн-хоторон биэрдэ. Софронеева М.А., Алексеева А.Е., Осипова С.В. састааптаах дьүүллүүр сүбэ күрэҕи кыраҕатык кэтээн көрдө-иһиттэ, сөпкө сыаналыырга дьулуста.

    Түмүк таһаарыытыгар оһуокайы таһаарааччы  уус-уран тыла-поэзията, хоһуйуутун үтүө дьайыыта,   куолаһа-ырыата,  хамсаныыта, сахалыы таҥаһа,   түһүмэхтэри тутуһуута  учуоттанна. Кыайыылаахтарынан ааттаннылар уонна Мэҥэ суругу кытары үтүгэн суумалаах харчынан бириэмийэлэннилэр Уйгулаана Терентьева,  Нарыйа Назарова,  Евгений Гоголев,  Сайыына Тимофеева, Мичийэ Лазарева, Надежда Кузьмина, Күннэй Кузьмина,  Сахаяна Потапова, Сайыына Осипова,  Диана Бурнашева Диана Васильева.

    Дьэ  уонна 10000 суумалаах Кылаан бирииһи  тутта, “Бастыҥ этээччи” аатын ылла,  кыайыы өрөгөйүн биллэ, үөрдэ-көттө  колледжка үөрэнэ сылдьар Үөһээ Бүлүү ыччата, Кэнтик оскуолатын бүтэрбит, Мойтохонова А.М. — Сахаайтаҕа  уһуйуллубут  талаан кыыс  Ангелина Ксенофонтова.   Кылаан бирииһи туруордулар колледжка өр сылларга олус айымньылаахтык үлэлээн ааспыт, устудьуон кутун-сүрүн туппут учуутал, уһуйааччы, кэрэ киһи,  айылҕаттан айдарыылаах алгысчыт, түсчүт, уран тыллаах  оһуокайдьыт    Розалия Степановна Семенова  төрөппүт кыргыттара Боронова С.М., Варламова С.М. уонна аймахтара.

   Күһүҥҥү ыһыахха кэлбит дьон кэрэ көстүүлээх сахалыы таҥас арааһын кэппиттэрэ, күһүҥҥү күнү киэргэппиттэрэ  ураты болҕомтоҕо ылылынна уонна саха күһүн-саас сөрүүн кэмҥэ кэтэр таҥаһын  “Норуот талар” диэн көрүү ыытылынна.   Басова Е.В. салайааччылаах сүбэ быһаарыытынан  кыайыыны ситистилэр уонна   профком  аатыттан “Көмүлүөк”  фирма   бириистэринэн  бэлиэтэннилэр  үлэҕэ, сынньалаҥҥа өрүү инники күөҥҥэ сылдьар Алексеев Е.Р., Назарова В.М.. Евсеев М.Д.

     Бу күн сайын илгэтиттэн сомсуллубут ас-үөл  быыстапката,  атыыта тэрилиннэ. Манна   байдам,  дэлэгэй хаһаайкаларынан  буоллулар Петрова А.С., Гуляева С.А., Федорова О.Ф. , Жиркова А.Д., Мискяева Л.В. , Токарская А.В., Петрова И.Е.  уо.д.а.

    Саҥа тэрээһини   дьон-сэргэ улаханнык сэҥээрдэ, сэргээтэ,  актыыбынайдык кытынна, онтон тэптэрэн,  «Күһүҥҥү ыһыаҕы» үгэскэ кубулутар сорук турда.

С.Мытник

Категория:

TТэг

Комментариев нет

Авторизация
*
*
Генерация пароля
Решаем вместе
Проблемы с госуслугами, медленный интернет или плохая связь? Напишите об этом — Минцифры поможет с решением