Дьөккөн орто оскуолатыгар педагогическай экспедицията.

Н.Г.Чернышевскай аатынан Бүлүү педагогическай колледжын 16 устудьуоннара Советскай Союз Геройа Н.А.Кондаков аатынан 100–с сааһын бэлиэтиир Дьөккөн орто оскуолатыгар педагогическай экспедицияҕа сырыттылар.

Экспедиия сыала, соруктара:

  • устудьуоннар колледжка ылар билиилэрин, сатабылларын үөрүйэхтэрин сатаан таба туһаналларыгар усулуобуйа, эйгэ тэрийии;
  • оскуола оҕону иитэр-үөрэтэр тиһигин кытары билсии;
  • Бүлүү педучилищетын киэн туттар выпускнига Советскай Союз Геройа Н.А.Кондаков аатынан оскуоланы кытта баар ситими хаҥатыы, сайыннарыы

 

Мин Дьөккөн оскуолатыгар үөрэммитим, онтон билигин 9-с кылаас кэнниттэн колледжка информатика салаатыгар үөрэнэбин, программист идэтин талбытым. Экспедицияҕа видеооператорынан сырыттым уонна хаартыскаҕа түһэрэн киирдим. Оскуолам учууталлара, бииргэ үөрэммит табаарыстарым үөрэ көрүстүлэр. Герой Н.А.Кондаков уонна Н.И.Протопопова тустарынан баай матырыйаалы хомуйдубут. Н.И.Протопопова туһунан хаартысканан дьүһүйүү-быыстапка таһааран, оскуола музейыгар бэлэхтээтибит.

Василий Колтовской, информатика салаата

Биһиги салаабытыгао “Эколайн” диэн диэн түмсүүлээхпит. Айылҕаны харыстааһын ис хоһоонноох бары тэрээһиннэргэ кытта турабыт. “Зеленый пояс Вилюя” пуонданы кытта ыкса үлэлиибит. Пуонда быйыл 5 сыллаах үлэтин түмүгүнэн биһиги “Бастыҥ тумсүү” Грант ылбыппыт. Дьөккөҥҥө тахсыыбытыгар  20 араас сибэкки үнүгэстэрин силис тартаран таһааран олортубут, оскуола күөх эйгэтин хаҥаттыбыт. Маннык ааксыйалары салгыы атын да оскуолаларга тэрийиэхпит диэн былааммытыгар киллэрдибит.

Сахая Минина, коррекционнай педагогика салаата

 

Үөрэнэр кыһабыт төрүттэммитэ 100-с сылыгар аналлаах “100 сылбытыгар 100 хардыы” диэн проекпыт чэрчитинэн колледжпытын араас кэмнэргэ бүтэрбит выпускниктар ахтыыларын хомуйуу — экспедициябыт биир сүрүн үлэтинэн буолар. Дьөккөн осколатыгар күн бүгүн биһиги выпускниктарбыт 12 учуутал үлэлиир. Кинилэр үөрэммит сылларын, учууталларыни олус иэйэ ахталларын истэр наһаа үчүгэй уонна өссө долгутуулаах буолар эбит. Бу иннигэр Дьокуускайга уонна Үөһээ Бүлүүгэ тиийэн элбэх матырыйаал ылбыппыт. Ахтыылары сурукка тиһэн иһэбит.

Екатерина Дыдаева коррекционнай педагогика салаата

 

Биһиги Герой Н.А.Кондаков бойобуой суолларынан квест-оонньуу ыыттыбыт. Оҕолор көхтөөхтүк уонна ситиһиилээхтик кытыннылар. Киэн туттар биир дойдулаахтарын туһунан үгүһү билэллэрин хайҕаатыбыт. Автомат хомуура, картанан сирдэтэн Герой сулуһун көрдөөһүн улахан тыҥааһыннаахтык ааспыттара. Күрэх түмүгүнэн «Патриот» хамаанда бастаабыта. Биирдиилээн түһүмэхтэргэ хоппуттар мэҥэ суруктарга тиксибиттэрэ. Иннокентьев Алексей, Жирохов Валентин бастыҥ хамандыыр ааттарын ылбыттара.

Туяра Федотова, Надежда Алексеева дошкольнай салаа

Оскуолаҕа тахсан 5-6 кылаас оҕолоругар Lego набордар араастарын туһунан кэпсэттибит, хайдах роботтары оҥоруохха сөбүн ырыттыбыт. Аныгы үйэҕэ олох бары эйгэтигэр робот суолтатын туһунан оҕолор улаханнык интэриэһиргээтилэр, элбэҕи ыйыталллар, билиилэрэ да үчүгэй. Оскуолаҕа эбии дьарык баара биллэр. Түмүккэ хамаанданан хайдыһан роботтары оҥордубут уонна куоталаһыы тэрийдибит. Дьяконова Нелли, Николаева Камилла олус сатабыллаах кыргыттар диэн хайгыыбын, маладьыастар.

Павел Дубинин, эбии үөрэхтээһин салаата

 

Алын кылаас учууталларын бэлэмниир салааҕа үөрэнэбит. Экспедицияҕа кыттыһан 1-2 кылаас оҕолоругар өйү сытыылыыр, тылы сайыннарар дьарык-оонньуулары тэрийдибит. Оҕолор бэркэ кытыннылар, олус актыыбынайдар, саҥарар дьоҕурдара, билиэн-көрүөн баҕалара лаппа сайдыбыт. Түмүккэ, тоҕо урут биһиэхэ кэлэ сылдьыбатаххытый уонна өссө хаһан кэлэҕит диэн ыйытан соһуттулар, барахсаттар. Кэлиэхпит диэн тылбытын биэрэн тарҕастыбыт.

Алина Михайлова, Мария Иванова

 

 

 

Мин Герой Н.А.Кондаков аатын сүгэр оскуолаҕа тахсарбар өр толкуйдаан баран, герой оҕолор тустарынан кэпсииргэ санаммытым. 3-4 кылаастар баҕар өйдүөхтэрэ суоҕа диэн санаабытым, хата оҕолорум олох бэркэ ылыннылар. Геройдуу олох, геройдуу кыргыһыы, геройдуу хорсун быһыы, ким герой буолуон сөбүй диэн өйдөбүллэри киэҥник ырыталларын, өйдүүллэрин бэлиэтээтим. Оҕолор чахчы да, Герой аатын сүгэр оскуола үөрэнээччилэрэ буолалларын көрдөрдүлэр диэн астынным.

Айтал Николаев, алын сүһүөх оскуола учууталларын бэлэмниир салаа

Бу бэрт сотору “Сыл бастыҥ устудьуона” күрэх буолаары турарынан сибээстээн, мин онно бэлэмнии сылдьар логопедическай дьарыкпын ыыттым. Саҥарар үөрүйэхтэригэр бытаарыылаах оҕолору кытта үлэлэстим. Детсад иитээччилэрэ, сэбиэдиссэй А.И.Ионова элбэх сүбэлэри биэрдилэр, онон наһаа туһалаахтык сырытттым. Куонкуруска эрэллээхтик кыттыам диэн санаам бөҕөргөөн кэллим. Маны таһынан оҕолорго «Айылҕаны харыстыыбыт” диэн уруһуй куонкуруһун тумүгүн таһаардыбыт. Биһигини кытта методиспыт А.К.Петрова сылдьыста.

Владлена Петрова, коррекционнай педагогика салаата.

 

Бэйэм Булунтан сылдьар уонна омукпунан эбээн буоларым быһыытынан норуотум култууратын билиһиннэрэ таарыйа «Киирбэт күн дойдутугар айан” диэн старшай группа оҕолоругар физкультураны уонна тулалыыр эйгэни хабан, дьарык ыыттым. Оҕолор уонна үлэһиттэр олус сэҥээрдилэр, бары көхтөөх баҕайытык өйөөтүлэр, онон дьарыкпын аһара табыллан ыыттым. Элбэх туттар тэрил оҥорбутум туһалаата. Оҕолор барытын илэ харахтарынан көрөн, илиилэринэн тутан-хабан, бэйэлэрэ үөрэ-көтө туһаннылар. Дьөккөн туһунан кинигэ бэлэхтээтилэр, салгыы коллеһы кытта сибээһи ыкса тутуһарга диэн баҕа санааларын эттилэр. Детсад коллектива олус аймньылаахтык үлэлииллэрин бэлиэтии көрдүм. Оҕоҕо туһуламмыт анал муннуктар, дьарыктар тэриллэрэ орун-оннугар барыта баар. Наһаа истиҥ уонна хардарыта туһалаах көрсүһүү буолла.

Федора Ачикасова, коррекционнай педагогика салаата.

 

Сердцев Дмитрийдиин 7-8 кылаастарга Abobe Photoshop программанан үлэлииргэ үөрэттибит. Үлэ алгогритмын биэрдибит уонна онон дьарыктаатыбыт. Олоҥхо геройдарын уобарастарын чочуйдубут, хамнатан көрдүбүт. Оҕолор билэр, интэриэһиргиир темалара буолан, чугастык ылыннылар. Уруоктарыгар бу теманы барбыт буолан, дөбөҥнүк өйдөөтүлэр уонна көхтөөхтүк кытыннылар. Корякин Харысхан, Васильев Данил наһаа үчүгэйдик толкуйдаан, бэйэлэрин варианнарын оҥорбуттарын бэлиэтиибит.

Александр Михайлов, информатика салаата