Иван Васильевич Мигалкин, Саха Республикатын норуодунай поэта, СР Суруйааччыларын сойууһун бэрэсэдээтэлиттэн интервьюну ылла саха тылын учуутала Софронеева Мария Андреевна:
CМ — Үтүө дьоро юбилейдаах күнүнэн, Иван Васильевич. Бүлүүтээҕи педагогическай училищены хас сыллаахха үөрэнэн бүтэрбиккиний уонна үөрэммит кыһаҥ олоххор туох суолу хаалларбытай?
Иван Васильевич — Мин 15 саастаах кыракый уолчаан 8 кылааһы бүтэрэн, Бүлүү куоратыгар Н.Г.Чернышевскай аатынан педучилищеҕа үөрэнэ кэлбитим. Ол кэминээҕи оҕолор бары да хаар курдук ыраас майгылаах этибит. Мин Бүлүү сириттэн-уотуттан куорсун анньыммытым, айар үлэм маҥнайгы олуктара мантан саҕаламмыттара. Үөрэнэ сылдьан билбитим Бүлүүм дьоно-сэргэтэ эйэҕэс-сайаҕас майгылааҕын, аһыныгас дууһалааҕын. Бүлүү куората мин иккис дойдум буолбута. 1969-1973сс. үлэлээбит бары преподавателлэри, техүлэһиттэри, биир кэмҥэ үөрэммит студеннарбын олус истиҥник саныыбын-ахтабын. Урукку үөрэммит, устудьуоннаабыт кэмнэрим билигин эрэ буолан ааспыт курдук саныыбын.
CМ — Бу юбилейдаах сылга колледж үлэһиттэригэр, ыалдьыттарыгар тугу баҕарыаҥ этэй?
Иван Васильевич — Бүлүүм дьоно барахсаттар, үөрэммит кыһам уһуйааччылара өрүүтүн инникигэ эрэллээх, кытаанах санаалаах буолуҥ, ыраахтан кытара кыыһар сардаана сибэккилии иһирэх майгыгытын ыһыктымаҥ!
Хотугулуу –Илиҥҥи университет саха филологиятын уонна культурологиятын деканын Гаврил Гаврилович Филипповы кытта кэпсэттэ саха тылын учуутала Софронеева Мария Андреевна:
СМ — Гаврил Гаврилович, эһиги олоххут, научнай, салайар үлэҕит Бүлүүтээҕи педагогическай коллеһы кытта ыкса ситимнээх. Бу үөрүүлээх түгэҥҥэ колледж уруккутун туһунан тугу саныа-ахтыа этигитий?
Гаврил Гаврилович — 1992 сыллаахха биһиэхэ саха филологиятын уонна культурологиятын бакылтыата тэриллибитэ. Ол тэриллэр кэмнэригэр училище директора Н.П. Куличкин миэхэ кэлэн: ”Биһиги училищебытыгар эмиэ саха тылыгар идэтийэр салааны арыйыахпытын баҕарабыт, көмөлөһөр кыахтааххыт дуо?“– диэн көрдөспүтэ.”Үрдүк үөрэх министерствотын кытта сүбэлэһиҥ, кинилэр көҥүллүүр буоллахтарына, биһиги салалтабыт көмөлөһөр кыахтаах”- диэн быһаарсыбыппыт. Үөрэх Министерствотыттан көҥүл ылбыттар этэ. Онно түбэһиннэрэн факультет училищены кытта договор түһэрсэммит үлэбитин саҕалаабыппыт. Бииргэ үлэлээһиммит 20- чэ сыл салҕанан барбыта.
Г.Г.Торотоевы кытта кэпсэттэ Гаврильева Сайыына.
-Үтүө күнүнэн Гаврил Григорьевич, бырааһынньыгынан! Бу юбилей тэрээһиннэрэ хайдах ааһан эрэллэр дии саныыгыт?
— Мин сарсыарда юбилей аһыллыытыгар сырыттым, олох кетеҕүллүүлээхтик, сэргэхтик ааста. Оҕолору көрөн үөрдүм, хайдах курдук үҥкүүлүүллэрин. Алгыс ылынныбыт, эҕэрдэ тыл бөҕө иһиттибит. Бу юбилейдаах күн өрө көтөҕүллүүлээхтик са5аланна.
-Олус сэргээн, интэриэһиргээн, тугу көрдүгүт?
-Кинигэ сурэхтэниитигэр сырыттыбыт, кинигэ атыыластыбыт. Мин, Николай Петрович Куличкин, биһиги саҕана директордыы сылдьыбыт киһи кинигэтин атыыластым уонна үөрэх кыһатын кэрийэн көрдүбүт.
-Тугу баҕарыа этигитий колледжка, бу юбилейынан сибээстээн?
-Мин ыччакка туһаайан этиэхпин баҕарабын бу манна үөрэнэргитинэн киэн туттуҥ диэн, тоҕо диэтэргит, киһи үөрэҕи аллараттан саҕалыыра ордук. Мин, ити суолу бэйэм бардаҕым дии. Анал үөрэххитин бүтэрэн, үрдүк үөрэххэ барыҥ. Бүлүү педколледжа студеннары олус хаачыстыбалаахтык бэлэмниир, үөрэтиини элбэхтик оҕо дьоҕуругар, сатыырыгар туһаайаллар, онон оҕолор үчүгэй бэлэмнээх тахсаллар.
Ыччакка туһаайан эттэххэ, кыраттан иҥнибэккэ эрэ, кыһалҕаны туораан, үөрэх туһугар киьи кытаанах санаалаах, олоҕор суолдьут сулустаах буолуохтаах. Ол суолдьут сулуһа кини ыра санаата уонна былаана диэххэ сөп.
-Интервьюгут иһин махтал.
Михайлова Мария Никифоровна — выпускник 1956 года отличник образования РС (Я), Учитель учителей РС (Я)
1954 сыллаахха Хампа оскуолатын бүтэрэн баран училищеҕа үөрэнээри подругабын кытта сатыы киирбиппит. Директор Гурьев С.С. биһигини үөрэ–көтө кэрсүбүтэ, дьоллоох да кыргыттар эбиккит, билигин 28 киһи баар эһигини кытта 30 буолаҕыт. Барыта 30 буолан кэргэннии Александровтарга үөрэммиппит. Куурус салайааччыларынан, 1 кууруска — Воронкина М.С., 2 кууруска — Гаврильев И.Н. үлэлээбиттэрэ. Барытыгар бастыҥ гына сатыыр этилэр. Саһаан кэрдиитигэр бастыҥ гынаары Гаврильев И.Н. эрдэттэн эрбии, сүгэ булбут этэ. Куурус оҕолоругар барыларыгар кыһаллаллар этэ. Үөрэнэр кэмнэрбэр интернатка олорбутум. Уочаратынан дьуһуурунайдыыр этибит. Иллээхтик, бэйэ-бэйэбитигэр көмөлөсүһэн олорбуппут. Сарсыарда 6 чааска туран повардарга көмөлөһөр этибит. Киэһэ ас бэрсэллэрэ, ону хоско олорор кыргыттарбын кытта үөрэ–көтө сиэн кэбиһэрбит. Ити сылларга училище комсомолун сэкэрэтээринэн Петрова Варвара Андреевна үлэлиир этэ. Мин бэйэм 2 сыл кууруспар комсомол сэкэрэтээрэ этим. Училищеҕа ыытыллар бары тэрээһиннэргэ саамай актыыбынай кыттыыны ылар этибит. 30 оҕо бары бүтэрбиппит. Училищены бүтэрэн баран 2 буолан Эбээн-Бытантай улууһугар үлэлии барбыппыт. Онно 2 сыл үлэлээбитим. Онтон 45 сыл устата Хампа орто оскуолатыгар алын сүһүөх кылаас учууталынан үлэлээтим. Саамай киэн туттар бастакы үөрэнээччибинэн буолар Григорьева Л.М. медицина наукатын доктора, 5 омук тылын билэр. Билигин Канадаҕа олорор. Кини уола эмиэ медицина үлэһитэ. Бу училищены-колледжы бииргэ төрөөбүт убайым эмиэ, 1951 сыллаахха үөрэнэн бүтэрбитэ, кыра кыыһым уонна 5 сиэним манна үөрэнэн бары учууталлыы сылдьаллар.
10 сыл анараа өттүгэр юбилейга кэлэ сылдьыбытым. Тэрээһиннэр барыта олус үчүгэйдик ааспыттара. Бу 95 сыллаах юбилейынан бары учууталларга, выпускниктарга итии–истиҥ эҕэрдэ буоллун.
