Сэтинньи 12 күнүгэр Бүлүү улууһугар Олоҥхо декадатын чэрчитинэн Н.Г.Чернышевскай аатынан Бүлүүтээҕи профессиональнай-педагогическай кэллиэскэ «Олоҥхо дьоро киэһэтэ» тэрилиннэ. Олоҥхоһут, тойуксут, алгысчыт Василий Осипович Каратаев аатын сүгэр олоҥхоһуттар уонна тойуксуттар норуодунай кэлэктииптэрэ, Олоҥхоһут Харатай Баһылай ыччаттара кэллиэс устудьуоннарын кытта көрүстүлэр, олоҥхо дьикти алыптаах эйгэтин билиһиннэрдилэр. Тамара Куланова, Александр Иванов, Рудольф Томскай, Айысхаана Васильева, Ренат Иванов, Светлана Харлампьева уонна Нюргуяна Саввинова састааптаах норуодунай кэлэктиип Василий Каратаев «Моҕул кугас аттаах Модун Эр Соҕотох» олоҥхотуттан быһа тардыылары толорбуттарын кэллиэс устудьуоннара сэргии иһиттилэр. Дьоро киэһэни кэлэктиип салайааччыта, Саха Өрөспүүбүлүкэтин култууратын туйгуна Светлана Иванова иилээн-көҕүлээн ыытта. Норуодунай кэлэктиип эдэр толорооччулара Тамара Куланова, Александр Иванов, Рудольф Томскай, Айысхаана Васильева, Нарыйа Шамаева, Ренат Иванов, Капитон Львов, Христина Осипова аҕыйах хонугунан Кэбээйигэ өрөспүүбүлүкэтээҕи «Муҥха олоҥхото- 2025» тэрээһиҥҥэ кыттыахтара. Бүлүү улууһугар Олоҥхо декадатын арыллыытыгар норуодунай кэлэктиип үс көлүөнэ толорооччулара «Модун Эр Соҕотох» олоҥхону толорбуттара улахан сэҥээриини ылбыта.

Николай Куприянов тиэксэ