Тыл диэн норуот үйэттэн үйэҕэ, уонунан сүүс сыл устата урукку дьыллар уорҕаларыттан, ааспыт дьыллар арҕастарыттан мэңэ өйдөбүл гынан илдьэ кэлбит, туохха да тэңнэммэт, сүппэт сүдү баайа.
Олунньу 13 күнэ Саха Сиригэр Төрөөбүт тыл уонна сурук-бичик күнүн быhыытынан бэлиэтэнэр. Саха Ѳрѳспүүбүлүкэтин бастакы Бэрэсидьиэнэ Михаил Ефимович Николаев «Төрөөбүт тыл уонна сурук-бичик күнүн биллэрэр туhунан» 1294 № Ыйааҕа 1996 сыллаахха олунньу 9 күнүгэр тахсыбыта.
Бу күнү Н.Г.Чернышевскай аатынан Бүлүүтээ5и профессиональнай-педагогическай колледж устудьуоннара, үлэhиттэрэ сылын аайы көтүппэккэ бэлиэтииллэр. Ол курдук олунньу ый 10-14 күннэригэр араас хабааннаах тэрээhиннэр ыытыллаары тураллар.
Олунньу 10 күнүгэр Н.Г. Чернышевскай аатынан Бүлүүтээҕи профессиональнай-педагогическай колледжка Н.И.Ылахова аатынан «Алгыс» НКК иһинэн үлэлиир Светлана Тарасовна Иванова салайааччылаах В.О. Каратаев аатынан олоҥхоһуттар уонна тойуксуттар норуодунай кэллэктииптэрэ төрөөбүт тыл, сурук-бичик нэдиэлэтин үөрүүлээхтик арыйыыга кытыннылар.
Бүлүүлүү сыыйа тардан хомуһунан СӨ үтүөлээх үлэһитэ Августина Платоновна Евсеева арчылаата. Алгыс сиэрин-туомун алгысчыт Нюргуяна Капитоновна Саввинова толордо.
Түмүгэр Омоҕой баайбыт саҕаттан оонньонуллубут оһуокайы, эдэр кэскиллээх үҥкүү тылын этээччи Александр Иванов — Уол Сомоҕо оһуокайы оройуттан тутта.
Сахалыы сиэринэн алгыстаах алаадьынан айах тутан күндүлээһин буолла.
Устудьуоннар, үлэһиттэр сахалыы таҥнан кэлэн көхтөөх кыттыыны ыллылар.
Бу курдук төрөөбүт тыл кэхтибэт, сүппэт анала биhигиттэн хас биирдиибититтэн тутулуктаах. Билигин биһиги бары норуот бараммат баай тылын, үйэлээх култууратын, үтүө үгэhин уонна ылбаҕай суругун-бичигин харыстаан, хаҥатан кэлэр көлүөнэҕэ тиэрдэр хоруйу тутуохтаахпыт. Сахалыы сайаҕастык саҥарар, иэйиибитин истиҥник этинэр Ийэ тылбыт үйэлэргэ сүппэккэ үүнэ-сайда турдун!
