Сахам тыла, сарсыҥҥылаах буол,
Ийэ тылым, кэскиллээх буол,
Кэнчээри ыччат кэпсээнигэр,
Ыччат дьонуҥ саҥатыгар
Иһиллэ тур, сайда тур, ыллыы тур!
Тыл – саха омук үтүмэн үйэлэргэ чочуйбут, чопчулаабыт өйдөбүлэ, өлөрү кыайбыт өйө. Саха тылыгар норуоппут олоҕо, кута – сүрэ, майгыта – сигилитэ, өйө – санаата, иэйиитэ, философията – барыта баар.
Олунньу 13 күнэ Саха Сиригэр Төрөөбүт тыл уонна сурук-бичик күнүн быhыытынан бэлиэтэнэр. Саха Ѳрѳспүүбүлүкэтин бастакы Бэрэсидьиэнэ Михаил Ефимович Николаев «Төрөөбүт тыл уонна сурук-бичик күнүн биллэрэр туhунан» 1294 № Ыйааҕа 1996 сыллаахха олунньу 9 күнүгэр тахсыбыта.
Бу Күн олохтонуута Саха Сирин төрүт олохтоохторун төрөөбүт тылларын сайыннарыыга, бастакы саха суругун-бичигин олохтообут саха лингвист-учуонайа, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах.
Бу күн Өрөспүүбүлүкэ үрдүнэн ньиргиччи тэрээһиннэр ыытыллалар. Н.Г.Чернышевскай аатынан Бүлүүтээҕи профессиональнай-педагогическай колледж иһинэн араас таһымнаах тэрээһиннэр, күрэстэр буоллулар. Саргылаах сахабыт тыла сандаарар Олунньу 13 күнүгэр устудьуоннар уонна уһуйааччылар үөрүүлээх линейка ыытылынна. Тэрээһиҥҥэ “Айылгы” ырыа-үҥкүү народнай коллектива, эбии үөрэхтээһин устудьуоннара кыттыылаах буолла.
Билигин биһиги бары норуот бараммат баай тылын, үйэлээх култууратын, үтүө үгэhин уонна ылбаҕай суругун-бичигин харыстаан, хаҥатан кэлэр көлүөнэҕэ тиэрдэр хоруйу тутуохтаахпыт. Сахалыы сайаҕастык саҥарар, иэйиибитин истиҥник этинэр Ийэ тылбыт үйэлэргэ сүппэккэ үүнэ сайда турдун!
