Саха народной поэта, прозаик, драматург, Саха АССР искусстваларын үтүөлээх деятелэ, “Бочуот знага” орден кавалера, саха комсомолун премиятын лауреата, ССРС суруйааччыларын Сойууһун чилиэнэ Иван Михайлович Гоголев – Кындыл 2025 сыл тохсунньу 18 күнүгэр төрөөбүтэ 95 сылын туолуохтаах. Ол бэлиэ, дьоро күнү көрсө Эбии үөрэхтээһин салаатын устдьуоннара “Хотугу сибэкки” диэн айымньытыттан быһа тардан иккис оонньуутун көрөөччү дьүүлүгэр таһаардылар.
Оруолларга бастакы уонна иккис кууруска үөрэнэр сценическэй үлэни тэрийии хайысхатын устдьуоннара оонньоотулар. Ол курдук, Хойостоону – Святослав Гаврильев, Малардыырап Мөрүөн Саабыһы – Александр Гаврильев, Чаархааннаах Хоборооһу – Моника Егорова, Кыыс Уоланы (Өндөрүүсэ) – Виталий Мучурунов, Тиэхэ Тиэхээни – Алан Мунхасытов, Онтуоска – Айтал Слепцов көрөөччү иннигэр толордулар.
Иван Гоголев бу айымньытын жанрын оперетта диэн быһаарбыта. Онтон эбитэ дуу, бу айымньы сыанаҕа сэдэхтик туруоруллар. Дьиҥэр комедия быһыытынан сыанаҕа туруоруллун сөп.
Түмүккэ – саалаҕа мустубут көрөөччүлэр астынан, дохсун ытыс тыаһынан испэктээкил кытыылаахтарыгар махталларын биллэрдилэр.
