Учууталга анаан…

Колледж 100 сааһын туолар күнэ 3 сылы кыайбат кэм хаалла. Бу сыллар тухары төһөлөөх элбэх киһи сырдыгы, үйэлээҕи саҕааччы учуутал үрдүк аатын чиэстээхтик сүгэн саха норуотун инники сайдар саҕахтарын уһансыбыта буолуой.

Быйылгы үөрэх сыла колледжка Кыайыы 75 сылын көрсө “Буойун-учууталлар сылларынан” биллэриллибитэ. Үһүс этээскэ Учууталлар галереяларыгар саҥаттан, буойун-учууталларга аналлаах 9 стендэ оҥоһулунна. Манна араас сылларга биһиги үөрэхпит кыһатыгар үөрэммит уонна Аҕа дойдуларын көмүскүүр Улуу сэриигэ кыттыбыт дьоммут киирдилэр:

  1. Угүс үөрэнэр, үөрэтэргэ көмө кинигэлэри бэлэмнээбит, Ленин уордьанынан бэлиэтэммит Саха АССР, РСФСР оскуолаларын үтүөлээх учуутала Николай Васильевич Егоров,
  2. Саха АССР, РСФСР оскуолаларын үтүөлээх, ССРС норуодунай учуутала Михаил Андреевич Алексеев
  3. Бүлүү умнаһыгар үөрэхтээһин сайдыытын чинчийэр музейы тэрийбит Саха АССР оскуолаларын үтүөлээх учуутала Геннадий Семенович Донской
  4. Уеhээ Булуу оскуолаларыгар 40-ча сыл учууталлаабыт Саха норуодунай суруйааччыта Петр Николаевич Тобуруокап
  5. Саха АССР, РСФСР оскуолаларын үтүөлээх учуутала Николай Иванович Афанасьев
  6. Училищебытыгар үлэлии сылдьан Аҕа дойдутун көмүскүүр сэриигэ аттаммыт уонна кыргыс хонуутугар охтубут Иван Семенович Буслаев
  7. Сэбиэскэй Сойуус Дьоруойа Николай Алексеевич Кондаков
  8. Сахалыы Азбука–букубаары айбыт, сахалыы таба суруйарга үөрэтии методикатын сааһылаан наука кандидата ааты көмүскээбит Саха АССР оскуолаларын үтүөлээх учуутала Игнатий Иванович Каратаев
  9. Угүс сыл үлэлээбит Маҥнайгы Күүлэтин оскуолатыгар аата иҥэриллибит Саха АССР оскуолаларын үтүөлээх учуутала Прокопий Алексеевич Павлов

 Галереяны үөрүүлээхтик арыйыыга Үөһээ Бүлүүттэн, Тааһаҕартан, Дьөккөнтөн биир дойдулаахтара – учууталлар, аймахтара кэлэн сэргэх кыттыыны ыллыллар, дьоро күнү киэргэтэн, ситэрэн бардылар. Ыалдьыттарбыт өссө аһаҕас кылаас чааһа, уруок биэрэн устудьуон оҕолорго тугунан да кэмнэммэт истиҥ-иһирэх алтыһыылары тэрийэн педагог буолуохтаах ыччакка Учуутал диэн кимин, кини киһи, учуутал быһыытынан хайдах-туох көрүүлээх, майгылаах буолуохтааҕын өйдөнүмтүө тылынан, буойун-учууталлар холобурдарыгар кэпсээтилэр.

Ол курдук Үөһээ Бүлүүттэн республика биллиилээх методиһа, саха тылын уонна литературатын программаларын,  былааннарын оҥортообут, 48 араас кылаастарга аналлаах учуобунньуктары оҥорсубут, гвардеец-буойун Николай Васильевич Егоров тус аймахтарын аатыттан кийиит, 50 тахса сыллааҕыта Новгород куораттан кэлэн начальнай кылаас, кэлин нуучча тылын уонна литературатын учууталынан таһаарыылаахтык билигин да үлэлии сылдьар Надежда Ивановна Николаева (Гоголь) бэрт итэҕитиилээхтик, кини суруктарын, бэлэх биэрбит кинигэлэрин, аккырыыккаларын көрдөрдө, кэпсээтэ.

Иккис ураты сэһэннээх киһинэн буолла Н.М.Васильева, училищены 1979с. бүтэрбит начаалынай кылаас учуутала. Кини олорор уулуссата Н.В.Егоров аатын сүгэр эбит. Бастаан оҕото проект оҥорон оскуола, улуус конкурстарыгар кыттыбыт: хайдах бу улахан үтүөлээх киһи аатын үйэтитэр туһунан. Салгыы аны ийэ, учуутал бу проегы олоххо киллэрэр соругу туруорунан хаһыс да сылларын сир анатан, ойуур-бадараан сири тэҥнэтэн, киэргэтэн-симээн саҕалаабыттар. Күн бүгүн онно Н.В.Егоровка аналлаах бэлиэ-стелла турар. Былаан элбэх. Өссө да проект чэрчитинэн бэрт элбэх үлэ күүтэр эбит. Манна түөлбэ олохтоохторо оҕолуун-улаханныын биир киһи курдук үлэлии-хамсыы сылдьаллара олус улахан иитэр суолталаах. Кэнникитин бу оҕолор дойдуларын историятын эрэ буолбакка, олорон ааспыт көлүөнэ дьонун туохха да тэҥнэммэт хорсун быһыытын сыаналыыр дьон буолан үүнүөхтэрэ буоллаҕа.

Традиция быһыытынан нэдиэлэ устата устудьуоннар күн аайы истиҥ эҕэрдэлэрэ, ырыалара-үҥкүүлэрэ уһун переменаларга буолла, эҕэрдэ-хаһыаттар быыстала суох таҕыстылар.

Чэппиэр, бээтинсэ күн ветеран-учууталлар аһаҕас кылаас-чаастарын ыыттылар. Ол курдук Мария Федотовна Максимова, Софья Мартыновна Саввинова, Зоя Николаевна Борисова.

Колледж преподавателлэрэ эмиэ мэлдьи буоларын курдук аһаҕас уруоктарын ыыттылар. М.А. Софронеева сэрииттэн төннүбэтэх поэт, оҕо суруйааччыта, учуутал Н.К.Седалищев-Дьүөгэ Ааныстыырапка, Е.Р.Алексеев Е.В.Басовалыын “Разработка методического портфолио” диэн, олус сэргэх, интириэьинэй  дьарыгы ыыттылар.

Мэлдьи буоларын курдук суббуота күн устудьуоннар преподавателлэрин солбуйан уруок ыыттылар. Оттон бээтинсэ күн Учууталы чиэстиир иһирэх бырааһынньыкка саҥа кэлбит педагогтары көрсүү, ситиһиилээх үлэлээхтэргэ наҕаарадалары туттарыы, ол быыһыгар устудьуоннар эҕэрдэ ньүөмэрдэрэ, араас оонньуу, үҥкүү-битии сынньалаҥ киэһэтэ олус бэркэ ааста.

Колледж НМҮ ст. методиһа Н.В.Васильева