БҮЛҮҮ ОҔОЛОРО АЛРОСАҔА КУМААҔЫ КЫТАЛЫКТАРЫ ЫЫТТЫЛАР

Бүлүү өрүһүгэр буолбут техногеннай киртитиини утаран, Эбэ көмүскэлигэр болҕомто тардаары, Дмитрий Гаврильевич Макаров аатынан “Зеленый пояс Вилюя” экология пуондата «Ыра санаам – ыраас Бүлүүм» аахсыйа көҕүлээн, тэрийэн балаҕан уонна алтынньы ыйдарыгар ыыппыта. Аахсыйаҕа Сунтаар, Бүлүү, Үөһээ Бүлүү улуустарыттан,

  Дьокуускай куораттан барыта 700-н тахса оҕо, төрөппүттэр, студеннар, биирдилээн дьиэ кэргэттэр кыттан 4000 тахса саха норуотун маанылаах көтөрүн – кыталыктары оригами ньыматынан кумааҕыттан оҥорбуттара.

Пуонда дириэктэрэ Макарова П.Г. салайааччылаах акция кыттыылаахтарын делегацията сэтинньи сэттис күнүгэр Ийэ айылҕаҕа көмүскэллээх сыһыан илдьиттэрин-кумааҕы кыталыктары  Ил Дархаҥҥа туттардылар. Делегацияҕа Ил Түмэн депутата Захарова Н.Ф., пуонда Сүбэтин чилиэттэрэ Томская П.С., Мытник С.Г., СӨ норуодунай артыыһа Васильев Г.С., оройуон депутата Степанов А.А., «Чуораанчык» оҕо саадын сэбиэдиссэйэ Корякина Н.В., Бүлүү ыччатын «Ситим» түмсүүтүн салайааччыта Алексеев А.А. кыттыыны ыллылар. Айсен Сергеевич кыталыктары салгыы *АЛРОСА хампаанньа сүрүн дириэктэригэр,  Арассыыйа салалтатыгар* тиэрдэргэ эрэннэрдэ.

Пуонда Ил Дархаҥҥа норуотун итэҕэлин ылбытынан эҕэрдэлээн туран, экология боппуруостарыгар этиилэрдээх киирдэ. АЛРОСА компания таһаарбыт саахалыттан Бүлүү сүнньүн кытта тэццэ Элиэнэ Эбэ Хотун эмиэ эмсэҕэлээбититин саарбахтаабатын этэн туран, хоромньуну чинчийэр, быһаарар үлэни ыытары наадатын туруоруста. Иккиһинэн, ойуур баһаара аһара баран Сахабыт сиригэр тыһыынчанан гектарынан хара тыа умайарын тохтотор сыаллаах кыра авиацияны туһанан ойуур баһаардарын кэтээн көрүүнү ыытары сөргүтэр наадалааҕын этиннэ. Үсүһүнэн, балыктааһын боппуруоһугар олохтоох нэһилиэнньэ  быраабын күөмчүлээһини суох оҥорор үлэни федеральнай таһымҥа сокуон өттүгэр үлэлэһиини оҕолорбут,  кэлэр көлүөнэ доруобуйата төрүт астан эмиэ быһаччы тутулуктааҕынан, ирдэстэ. Ирдэһиилэри делегация суругунан туттарда.

Пуонда салалтата Ил Дархаҥҥа тылын тириэрдэн делегацияны кытта көрсүһэрин ситиспит, делегация кыттыыны ылбыт Ил Түмэн депутатыгар Нюргуяна Захароваҕа, Пуонда Сэбиэтин чилиэттэригэр, аахсыйаҕа кыттыбыт бары тэрилтэлэргэ, Бүлүү умнаһын олохтоохторугар  улахан махталын тириэрдэр. Кэнэҕэһин да бииргэ үлэлэһэргэ эрэллээҕин биллэрэр.

Официальный сайт Вилюйского педагогического колледжа